Алдарт жүжигчин Патрик Демпсигийн гол дүрд нь тоглосон “Memory of a Killer” цуврал амжилттай үргэлжилж, хоёрдугаар улирлаа албан ёсоор баталгаажуулсан тухай Fox телевизээс зарлалаа. Энэхүү шийдвэр нь эхний улирлын сүүлийн анги цацагдахаас ердөө хэдхэн минутын өмнө гарсан нь үзэгчдийн хувьд гэнэтийн бөгөөд таатай мэдээ болсон юм.
“Memory of a Killer” цувралд Патрик Демпси нь эрт үеийн Алцхаймер өвчний улмаас ой санамжаа алдаж буй мэргэжлийн алуурчин Анжело Дойлын дүрийг бүтээсэн нь шүүмжлэгч болон үзэгчдээс өндөр үнэлгээ аваад байна. Жүжигчин Патрик Демпси өөрийн карьертаа ийм өвөрмөц бөгөөд хүнд дүрийг бүтээх боломж олдсонд баяртай байгаагаа илэрхийлжээ. Тэрээр дүрийн санал ирснээс хойш 24 цагийн дотор шийдвэрээ гаргасан бөгөөд зохиолын өвөрмөц өнцөг нь түүний сонирхлыг шууд татсан гэдгийг онцолсон байна.
Fox телевизийн ерөнхийлөгч Майкл Торн уг цувралыг Патрик Демпси болон Майкл Империоли нарын чадварлаг жүжиглэлттэй, энэ улирлын онцлох бүтээл хэмээн тодорхойлсон юм. Цувралыг Warner Bros. Television-той хамтран бүтээж байгаа бөгөөд арилжааны болон хандалтын хувьд амжилттай байсан тул ийнхүү үргэлжлүүлэхээр шийджээ.
Тус цуврал нь 2026 оны 1-р сард нээлтээ хийснээсээ хойш бүх платформууд дээр нийт 16.2 сая үзэлттэй байгаа нь Fox-ийн түүхэн дэх хамгийн өндөр хандалттай стриминг цуврал болоод байна. Анхны анги нь сүүлийн зургаан жилийн хугацаанд гарсан хамгийн өндөр рейтингтэй драмын нээлт болсон юм. Хоёрдугаар улирлын зураг авалт болон гарах хугацаа нь удахгүй тодорхой болох бөгөөд 2026-2027 оны улиралд багтан үзэгчдийн хүртээл болох төлөвтэй байна.
