2017 оны “Дэлхийн хамгийн хүчтэй залуу” Эдди Холл холимог тулааны ертөнцийн супер од Фрэнсис Нганнутай тулалдах бодолгүй байгаагаа өмнө нь эрс илэрхийлж байсан бол одоо байр суурь нь бүрэн өөрчлөгджээ. Тэрээр Нганнутай хийх тулааныг өөрийн спортын замналыг өндөрлүүлэх хамгийн төгс тулаан хэмээн нэрлэж байна.
Эдди Холл 2022 оноос хойш бокс болон холимог тулааны (ММА) төрөлд хүч үзэж, тулааны спортын хүрээнд богино хугацаанд олны анхаарлыг татаж чадсан юм. Хэдийгээр тэрээр боксын тулаанд Хафтор Бьорнссонд ялагдсан ч ММА-гийн анхны тулаандаа Польшийн хүчтэн Мариуш Пудзяновскийг хүнд нокаутаар буулган авч, KSW холбооны түүхэнд нэгэн сонирхолтой ялалтыг байгуулсан билээ.
Тэрээр ирэх 6-р сарын 13-нд “Misfits Boxing”-ийн хүрээнд Томми Фьюритэй тулалдахаар төлөвлөж байгаа бөгөөд цаашид ММА-д илүү олон тулаан хийх зорилготой байна. Харин түүний хамгийн том хүсэл бол хүнд жингийн босоо аварга Фрэнсис Нганнутай хүч үзэх явдал юм. Сонирхолтой нь, Холл өмнө нь Пудзяновскийг ялсныхаа дараа Нганнутай тулалдахын оронд “чөтгөрт хүчирхийлүүлэхийг илүүд үзнэ” хэмээн егөөдөж байсан ч одоо тэрхүү айдас нь асар их сонирхол болон хувирчээ.
“Blood Elbow”-д өгсөн ярилцлагадаа тэрээр цөөхөн хэдэн тулаан хийж, өөрийгөө сорихыг хүсэж байгаагаа дурдсан байна. “Би дэлхийн аварга цолны төлөө өрсөлдөх хэмжээний тулаанчидтай зоригтой тулалдахад бэлэн. Дэвид ба Голиатын тулаанд би Голиатын дүрд тоглохоос айдаггүй, харин ч энэ нь надад урам зориг өгдөг” хэмээн Холл ярьжээ.
Тэрээр мөн Жэйк Пол боксын спортод шинэ сонирхол авчирсныг онцлоод, өөрийнх нь хувьд хамгийн сүүлчийн тулаан заавал Нганнутай байх ёстойг тэмдэглэв. “Ялсан ч, ялагдсан ч энэ миний сүүлчийн тулаан байх болно. Би дэлхийн шилдэг тулаанчтай хэрхэн тулалдаж чадахаа өөрөө харахыг хүсэж байна” гэж тэрээр нэмж хэлсэн байна.
