ОХУ болон Унгар улс эрчим хүч, эдийн засаг, соёлын салбарт хамтын ажиллагаагаа өргөжүүлэх 12 зүйлт төлөвлөгөөнд гарын үсэг зурлаа. Унгарт болох сонгуулийн өмнөхөн байгуулагдсан уг гэрээ нь хоёр улсын харилцааг шинэ шатанд гаргах зорилготой юм.
Хамтын ажиллагааны хүрээнд ОХУ-ын эрчим хүчний нөөц, тэр дундаа газрын тос, байгалийн хий болон цөмийн түлшний салбарт голлон анхаарахаар болжээ. Мөн Унгарын цахилгаан эрчим хүч болон устөрөгчийн төслүүдэд Оросын талын оролцоог нэмэгдүүлэхээр баримт бичигт тусгасан байна. Энэхүү гэрээ нь 2022 онд Украинд дайн эхэлснээс хойш Орос-Унгарын Засгийн газар хоорондын эдийн засгийн хамтын ажиллагааны комиссын анхны хуралдааны үеэр байгуулагдсанаараа онцлог юм.
Унгарын Гадаад хэргийн сайд Петер Сиярто тус гэрээг үндэсний ашиг сонирхолд нийцсэн алхам гэж тодорхойлоод, гадны хэвлэл мэдээллийн дарамт шахалтад автахгүй гэдгээ мэдэгдэв. Ерөнхий сайд Виктор Орбан ирэх сонгуульд дахин өрсөлдөхөөр бэлдэж байгаа бөгөөд түүний сонгуулийн кампанит ажил нь гадны нөлөөллийн талаарх маргаан дагуулж буй үед уг айлчлал болон гэрээ хийгдэж байна.
Хоёр улсын удирдагчид болох Виктор Орбан, Владимир Путин нар өнгөрсөн 11 дүгээр сарын сүүлээр Кремльд уулзаж, эрчим хүчний асуудлаар урьдчилан хэлэлцсэн нь энэхүү гэрээний үндэс болжээ. Кремлийн хэвлэлийн төлөөлөгч Дмитрий Песков Орбаныг “прагматик, үр дүнтэй удирдагч” гэж үнэлсэн бөгөөд энэхүү хамтын ажиллагаа нь Унгарын дотоод сонгуульд нөлөөлөх зорилгогүй гэдгийг онцолсон байна.
