300 сая жилийн настай, хүн төрөлхтний мэдэх хамгийн эртний наймаалж хэмээн тооцогдож байсан олдвор бодит байдал дээр огт өөр амьтных байсныг эрдэмтэд шинэ судалгаагаар тогтоолоо. Энэхүү нээлт нь далайн амьтдын хувьсал, тэр дундаа наймаалжны гарал үүслийн талаарх шинжлэх ухааны төсөөллийг бүхэлд нь өөрчилж байна.
2000 онд Иллинойсын палеонтологууд Pohlsepia mazonensis хэмээх олдворыг олж, наймаалжны төрлийн хамгийн эртний төлөөлөл хэмээн тодорхойлж байв. Урьд нь наймаалж 150 сая жилийн өмнө үүссэн гэж үздэг байсан бол уг олдвор энэ хугацааг даруй 150 сая жилээр уртасгаж байсан юм. Гэвч тухайн олдвор нь наймаалжны онцлог шинж чанартай боловч ямар нэгэн хатуу бүрхүүлгүй, найм эсвэл арван мөчтэй байсан нь судлаачдын дунд олон жилийн турш маргаан дагуулсаар иржээ.
Орчин үеийн дэвшилтэт рентген болон олон спектрийн дүрслэх технологийн тусламжтайгаар хийсэн шинжилгээгээр уг амьтны өмнө нь харагдаж байгаагүй шүдтэй ам болон хошууны хэсгийг илрүүлсэн байна. Ингэснээр Pohlsepia нь наймаалж биш, харин эртний далайн эрвээхэй (nautilus) төрлийн амьтан болох нь батлагджээ. Судалгааны удирдагч Томас Клементс “Дэлхийн хамгийн алдартай наймаалжны олдвор хэзээ ч наймаалж байгаагүй юм байна. Энэ амьтан чулуужихаас өмнө хэдэн долоо хоногийн турш задарч, хэлбэрээ алдсан байсан нь эрдэмтдийг төөрөгдүүлжээ” хэмээн тайлбарлав.
Энэхүү нээлт нь уг олдворыг Paleocadmus pohli хэмээх нэрээр дахин тодорхойлж, эртний далайн эрвээхэйн зөөлөн эдийн хамгийн эртний баримтыг бий болголоо. Үүний үр дүнд наймаалжны үүсэл хөгжлийн түүхийг дахин бичих шаардлага гарч байгаа бөгөөд тэдний орчин үеийн төрх анх хэзээ бүрэлдсэн талаар илүү тодорхой зураглал гаргах боломж бүрдэж байна.
