ОХУ-ын Засгийн газраас ирэх намар буюу есдүгээр сарын 1-нээс эхлэн улсын хэмжээн дэх бүх цэцэрлэгүүдэд “Эелдэг тоглоом” хэмээх шинэ хөтөлбөрийг нэвтрүүлэхээр болжээ. Энэхүү хичээл нь 2022 оноос хойш ахлах ангийн сурагчдад зааж буй “Чухал яриа” (Razgovory o Vazhnom) хичээлийн цэцэрлэгийн насныханд зориулсан хувилбар юм.
Тус хөтөлбөрийг албан ёсоор “ариун ёс суртахуун болон уламжлалт үнэт зүйлс”-ийг төлөвшүүлэх зорилготой хэмээн тодорхойлж байгаа бөгөөд ОХУ-ын Гэгээрлийн яамнаас одоогийн байдлаар сургалтын нарийвчилсан төлөвлөгөөг боловсруулж байна.
Өнгөрсөн онд ОХУ-ын 19 бүс нутаг болон эзлэн авсан Украины зарим газар нутагт уг хичээлийг туршилтын журмаар хэрэгжүүлсэн байна. Туршилтын явцад хүүхдүүдийг цэргийн хувцастай хувцаслах, тоглоомын зэр зэвсэг бариулах, шархадсан цэргийн дүрд тоглуулах зэргээр эх оронч үзлийг цэрэгжилтийн хэлбэрээр зааж байсан тухай мэдээллүүд гарч байв.
Шинэ хөтөлбөрийн хүрээнд 3-5 насны хүүхдүүдэд ОХУ-ын газрын зургийг шинэчлэгдсэн байдлаар (Украины зарим бүс нутгийг багтаасан) танилцуулж, “эх орноо хамгаалахын ач холбогдол”-ыг тайлбарлах ажээ. Хэдийгээр эрх баригчид үүнийг үндэсний үзлийг бэхжүүлэх алхам гэж үзэж байгаа ч шүүмжлэгчид болон хүний эрхийн идэвхтнүүд үүнийг бага насны хүүхдүүдийг улс төрийн суртал ухуулгад татан оруулж буй хэлбэр хэмээн буруутгаж байна.
