Олон улсын усны спортын холбоо (World Aquatics) ОХУ болон Беларусийн тамирчдыг олон улсын тэмцээнд өөрийн орны үндэсний далбаа, төрийн дууллын дор оролцох эрхийг нь бүрэн сэргээлээ.
Энэхүү шийдвэр нь 2028 оны Лос-Анжелесын Олимпын наадмын өмнө гарч буй томоохон өөрчлөлт бөгөөд Оросын усан спортын холбооны ерөнхийлөгч Дмитрий Мазепиний удаан хугацааны хүчин чармайлтын үр дүн гэж үзэж байна. Өмнө нь тус хоёр улсын тамирчид зөвхөн төвийг сахисан статустай буюу ямар нэгэн үндэсний бэлгэдэлгүйгээр оролцох эрхтэй байсан бол одоо үндэсний бүрэн эрхтэйгээр өрсөлдөх боломжтой боллоо.
Олон улсын олимпын хороо (IOC) 2022 оны хоёрдугаар сард Украин дахь дайны улмаас ОХУ болон Беларусийн тамирчдад хориг тавиад байсан билээ. Гэвч сүүлийн үед тус байгууллага байр сууриа зөөлрүүлж, цэргийн болон аюулгүй байдлын байгууллагатай холбоогүй тамирчдыг төвийг сахисан байдлаар оролцуулж эхлээд байсан юм.
Хэдийгээр үндэсний бэлгэдлээ ашиглах эрх нээгдэж байгаа ч ОХУ болон Беларусийн тамирчид аюулгүй байдлын тусгай шалгалт болон допингийн хатуу хяналтын доор байх нөхцөл хэвээр үлдсэн байна. Энэхүү шийдвэр нь 2016 оноос хойш допингийн асуудлаас үүдэн ОХУ-ын тамирчдын үндэсний далбаагаа ашиглах эрхийг хязгаарлаж байсан олон жилийн түүхэнд нэгэн шинэ хуудас нээж байна.
