The MongolZ баг nin9-ийн бүрэлдэхүүнд нэгдсэн анхны тэмцээндээ түрүүлж, 14 сарын турш үргэлжилсэн цомын ган гачгаа эцэслүүллээ. Тэд доод хүснэгтээс өрсөлдөгчдөө дараалан буулган авч, финалд PARIVISION-ийг 3:0-ээр хожсон юм.
nin9-ийн HLTV-д өгсөн ярилцлагаас:
The MongolZ-д нэгдэх боломж хэрхэн гарсан бэ?
nin9 өмнөх тэмцээнүүдэд багийн үзүүлэлт хангалтгүй байсныг харгалзан бүрэлдэхүүнд өөрчлөлт орохыг таамаглаж байжээ. Түүнд багт нэгдэх санал ирэхэд өөрийн ур чадвар, туршлагаар багийн ялалтад шаардлагатай хувь нэмрийг оруулж чадна гэдэгтээ итгэлтэй байсан гэж ярьсан байна.
Шинэ багт хэрхэн дасан зохицож байна вэ?
Тэрээр багтаа нэгдсэндээ баяртай байгаагаа илэрхийлээд, бусад тоглогчдоос өөр үүрэг гүйцэтгэх шаардлагатай болсон тул тоглолтын байр суурь, үүргээ өөрчилж байгаагаа хэлжээ. Тоглолт бүрийн дараа улам сайжрах боломжтой гэж үзэж байна.
Тэмцээнд түрүүлэхэд бэлтгэл дутмаг байсан нь нөлөөлсөн үү?
Баг тэмцээний өмнө хангалттай бэлтгэл хийж амжаагүй тул тоглолтын явцад гаргасан алдаагаа шууд засах шаардлагатай байжээ. Гэсэн ч тоглолт бүрээс суралцаж, алдаагаа багасгаснаар түрүүлж чадсан байна.
Шинэ багт ирэхэд дарамт мэдэрсэн үү?
28 настай nin9 өөрийгөө олон тоглогчтой харьцуулахад нас ахисан гэж үздэг тул тэмцээний дарамтыг төдийлөн мэдрээгүй гэжээ. Мөн багийн нөхөд нь өөрийн тоглолтод төвлөрөхөд нь тусалдаг гэж онцолсон байна.
Цаашдын тэмцээнүүдийн талаар юу хэлэв?
The MongolZ удахгүй PGL Masters Bucharest болон IEM Beijing тэмцээнүүдэд оролцох тул бэлтгэл хийх хугацаа хязгаарлагдмал байгаа аж. Өрсөлдөгчид тэдний тоглолтын бичлэгийг судлах учраас дараагийн тэмцээнүүд илүү хүнд байж болох ч амжилттай оролцож чадна гэдэгт итгэлтэй байгаагаа nin9 илэрхийлжээ.
Эх сурвалж: HLTV.org
