Бразил довтлогчийн амжилттай тоглолтыг өнгөрсөн амралтын өдрүүдэд Эспаньолын эсрэг оруулсан гоол бүрэн илтгэж байгаа юм. Энэ нь Антонигийн долоо хоногийн хоёр дахь хожлын гоол байсан бөгөөд нийт 20 тоглолтод долоон гоол, дөрвөн дамжуулалт өгч, Бетисийг Европын Лигийн эрхээ баталгаажуулахад гол нөлөө үзүүлээд байна. Цаашлаад Аваргуудын Лигт оролцох боломж ч нээлттэй хэвээр.
Мануэль Пеллегринигийн удирдаж буй Бетис баг Конференц Лигийн хагас шигшээд Фиорентинаг 2-1 харьцаагаар тэргүүлээд байгаа бөгөөд хариу тоглолт энэ Пүрэв гарагт болно.
Манчестер Юнайтед зарахыг хүсэж байна
Антонигийн Испанид харуулж буй тоглолт нь Манчестер Юнайтедын хувьд 2022 онд түүнийг Аяксаас 86 сая фунт стерлингээр авчирсан хөрөнгө оруулалтаа тодорхой хэмжээнд нөхөх боломжийг нээж байна. Премьер лигт амжилт дутмаг явж буй тэд түүнийг энэ зун боломжит өндөр үнээр худалдахыг зорьж байгаа ч Реал Бетис өөр зам сонгохыг хүсэж байна.
Испанид гарсан мэдээллээр бол Бетисийн удирдлагууд 25 настай Антониг 2025-26 оны улиралд дахин зээлээр авах асуудлаар Манчестер Юнайтедтай ярилцсан аж. Английн баг шууд зөвшөөрөх магадлал бага ч, хэрвээ сэтгэлд хүрэх санал ирэхгүй бол түүний цалингийн тодорхой хэсгийг нөхөх байдлаар дахин зээлээр явуулахад бэлэн байна.
Пеллегрини: “Антони өөрийгөө сорьсон нь бахархмаар”
Реал Бетисийн дасгалжуулагч, Манчестер Ситигийн хуучин дасгалжуулагч Мануэль Пеллегрини Антонигийн талаар:
“Тоглогчид санамсаргүйгээр €100 сая төлдөггүй. Антони энд ирэхдээ нас биед хүрч, өөрийгөө хөгжүүлэх хэрэгтэй гэдгийг ойлгосон байсан. Юнайтедэд өнгөрүүлсэн сүүлийн улирал нь түүнд тодорхой сургамж болсон байх.
Тэрээр тоглолт бүрт 2-3 үнэтэй зүйл хийж чаддагаар өөрийгөө ямар тоглогч болохыг харуулж байна. Хэт их техник ашиглахын оронд тоглолтыг зөв төгсгөх, багт үр ашигтай байх тал дээр төвлөрч байна — дамжуулалт, цохилт, багаа дэмжих хөдөлгөөн гээд.
Манай багийн тоглолтын хэв маяг түүнд тохирсон. Би түүгээр бахархаж байна. Түүнд хүндхэн үе байсан ч Испанид ирж өөрийгөө сорьсон нь түүний зоригийг харуулсан.”
