Хүүхэд, байгаль, роботын тухай ухаалаг адал явдал: Кристал гариг киноны нээлт ойртож байна

Оскарын шагналт Жереми Айронс, Ванесса Редгрейв, Майкл Йорк нар 3D анимэйшн, гэр бүлийн шинжлэх ухааны адал явдалт кино болох “The Crystal Planet”-ийн дуу оруулагч жүжигчдийн бүрэлдэхүүнд нэгдлээ. Энэхүү бүтээлийг Каннын кино наадамтай зэрэгцэн Sola Media олон улсын зах зээлд гаргаж эхэлжээ.

Киноны найруулагчаар Хорватын найруулагч Арсен Антон Остожич ажиллаж байгаа бөгөөд зохиол нь 1961 онд Оскар хүртсэн “The Substitute” хүүхэлдэйн богино бүтээлийн зохиолч Дусан Вукотичийн эх зохиолд үндэслэжээ.

Киноны үйл явдал 11 настай Риа гэх охины тухай бөгөөд тэрээр өөр гараг дахь колонид шинээр нүүж ирсэн нэгэн. Аав нь робот амьтан бүтээдэг үйлдвэрт ажилладаг бөгөөд Риа нэгэн нууцлаг амьтны бамбаруушийг олж, шинэ найз Эндигийн хамтаар түүнийг хамгаалах хэрэгтэй болно. Учир нь үйлдвэрийн эзэн энэхүү жинхэнэ амьтныг робот загвар болгохоор санаархаж байв.

Кинонд:

• Жереми Айронс — шуналтай ч хүүхдэдээ хайртай, ёс суртахууны хямралтай эрх баригч Мордоканыг
• Ванесса Редгрейв — нууцлаг амьтдын омгийн “Эхийн дүр”
• Майкл Йорк — тэдний “Эцгийн дүр”-ийг тус тус дуу оруулжээ.

Айронс энэ тухайд:

“Мордокан бол сонирхолтой, давхаргын дүр — тэр шуналтай үйлдвэр эрхлэгч хэдий ч хайртай охинтойгоо харилцаагаа хадгалахыг хүсдэг эцэг. Гэвч түүний дотоод шаналал шинэ гариг болон тэнд амьдардаг олон өнгөт амьтдыг аюулд оруулна,” хэмээн онцолжээ.

Энэ бол амьд жүжиглэлтээр алдартай найруулагч Остожичийн анхны бүрэн хэмжээний анимэйшн кино юм. Найруулагч дурсахдаа:

“Миний талийгаач профессор, Оскарын шагналт Дусан Вукотич 1990-ээд онд энэ зохиолын анхны нооргийг надтай хуваалцаж байсан. Хожим эрхийг өвлөж авсны дараа би эргэлзэж байлаа — ийм сорилтыг давж чадах уу гэж. Харин Alkay Animation Prague студи болон уран бүтээлч Петър Хорак, продюсер Петер Бадачтай хамтран ажиллаж эхэлснээр зам маань тодорхой болсон. Анимэйшний хязгааргүй боломж дунд ажиллах нь миний хувьд гайхамшигтай туршлага байлаа.”

Sola Media-гийн захирал Золвейг Лангеланд уг бүтээлийг:

“Өнөөгийн нийгэмд хамаатай, сонирхолтой адал явдал бүхий, байгаль хамгаалах ухаалаг санааг шингээсэн бүтээл. Том санаа, шилдэг авьяастнууд, Оскарын шагналт жүжигчидтэй энэхүү бүтээл нь дэлхийн гэр бүлийн зах зээлд тохирсон туйлын оновчтой кино” хэмээн магтжээ.

Киноны продакшныг Filmosaurus Rex, BFilm, Чехийн тэргүүлэгч студиудын нэг Alkay Animation Prague хамтран гүйцэтгэж байгаа бөгөөд тус студи өмнө нь My Sunny Maad бүтээлээр Ансигийн кино наадмаас шүүгчдийн шагнал хүртэж, Алтан Бөмбөрцөгт нэр дэвшиж байв.

Анимэйшний ерөнхий найруулгыг Rango, Pirates of the Caribbean, The Avengers зэрэг бүтээлүүд дээр ажилласан Якуб Пиштецки хариуцаж байна.

Төслийг Европын олон байгууллага дэмжиж байгаа бөгөөд үүнд: Хорватын Аудиовизуал төв, Чех болон Словакын кино сангууд, Чех ТВ, Хорват ТВ, Creative Europe/MEDIA, Eurimages зэрэг багтаж байна.

variety.com