Ferrari эхний улиралд хүчтэй өсөлт үзүүллээ
Porsche, Mercedes-Benz, Ford зэрэг хэд хэдэн автомашин үйлдвэрлэгчид АНУ-ын автомашин болон сэлбэгийн импортын татвартай холбоотой тодорхойгүй байдлын улмаас 2025 оны санхүүгийн төлөвлөгөөгөө түр зогсоосон бол Ferrari эсрэг байр суурь илэрхийлэв. Итали үйлдвэрлэгч энэ оны эхний улиралд 15%-ийн ашиг өсөлт үзүүлсний дараа 2025 оны орлогын төлөвөө баталгаажуулсан байна. Хэдий тийм ч тус компани АНУ-ын татварын нэмэгдэл 2025 оны ашигт 50 нэгжээр (0.5%) нөлөөлж болзошгүйг анхааруулсан.
Ferrari мөн түүхэндээ анх удаа үйлдвэрлэх цахилгаан автомашин болох Elettrica-гийн анхны хүргэлтийг 2026 оны 10-р сард эхлүүлэхээр төлөвлөжээ. Тус автомашины анхны танилцуулга энэ оны 10-р сард хийгдэх ба түүний “технологийн зүрх” буюу үндсэн цахилгаан системд төвлөрөх тухай Carscoops мэдээлжээ. Ferrari энэхүү автомашины цахилгаан мотор, батерейн модуль, хөрвүүлэгчийг өөрсдөө Maranello хот дахь үйлдвэртээ үйлдвэрлэнэ.
Ferrari-ийн амжилтын нууц юу байв?
Reuters-ийн мэдээлснээр Ferrari 2025 онд хүү, татвар, элэгдэл, хорогдлын өмнөх ашгийн хэмжээгээ €2.68 тэрбум евро (ойролцоогоор $3.03 тэрбум) хүргэнэ гэж таамаглажээ. Энэхүү амжилтыг голчлон үнэтэй, онцгой загварууд болох 499P Modificata ($5.4 сая), SF90XX (үндсэн үнэ $890,000), 12Cilindri (үндсэн үнэ $470,950) зэргийн борлуулалт өссөнтэй холбон тайлбарлаж байна. Мөн захиалгат хувилбаруудын эрэлт, өндөр ашигтай бүс нутгуудын борлуулалт нэмэгдсэн нь чухал нөлөө үзүүлжээ.
The Wall Street Journal-ийн мэдээлснээр Европ, Ойрх Дорнод болон Африк дахь борлуулалт 8%-иар өссөн бол Америкт 3%-ийн өсөлт үзүүлсэн байна. Хамгийн их хүргэгдсэн загварууд нь Roma Spider, 296 GTS, SF90XX цуврал болон Purosangue байв. Харин Хятад, Хонгконг, Тайвань дахь борлуулалт 25%-иар, Ази-Номхон далайн бүсийн бусад хэсэгт 6%-иар буурсан байна.
CEO Бенедетто Винья хэлэхдээ, Ferrari энэ улиралд 3,593 автомашин нийлүүлсэн нь өмнөх оныхоос 33 ширхэгээр илүү бөгөөд хүлээлттэй нийцсэн дүн байсан гэжээ. Тэрээр компанийн стратегийг “борлуулалтын тооноос илүү орлогын чанарт анхаарсан” гэж онцлов.
Энэ улиралд Ferrari-ийн цэвэр ашиг €412 сая евро ($465.9 сая) болж, өмнөх оны мөн үеийн €352 саяас өссөн байна.
“Бүх гол үзүүлэлтүүд хоёр оронтой өсөлт үзүүлсэн нь манай бүтээгдэхүүний бүтэц, хувь хүний захиалгын эрэлт дээр суурилсан өндөр ашигт байдлыг бататгаж байна” хэмээн Винья WSJ-д өгсөн ярилцлагадаа хэлжээ.
Харин үүний эсрэгээр Mercedes-Benz зэрэг үйлдвэрлэгчид эхний улиралд ашиг багассан талаар мэдээлж, 2025 оны санхүүгийн төлөвлөгөөгөө цуцалсан. Mercedes-Benz-ийн автомашины сегментийн ашиг 9%-иас 7.3%-д унасан бөгөөд тэд “татварын бодлогын тодорхойгүй байдал, хэрэглэгчийн зан төлөвт үзүүлэх нөлөө, эрэлт зэргээс шалтгаалан үлдсэн жилийн нөхцөл байдлыг үнэн зөвөөр таамаглах боломжгүй” гэж мэдэгджээ.
Дүгнэлт
Ferrari анхны цахилгаан автомашинаа танилцуулах албан ёсны товыг зарласан нь компанийн хувьд чухал үйл явдал юм. Энэ нь тэдний уг загварын талаар албан ёсоор цаг хугацааны төлөв өгсөн анхны тохиолдол болж байна. Үүнээс дутахааргүй чухал зүйл бол автомашины салбарын ихэнх компаниуд 2025 оны санхүүгийн төлөвлөгөөгөө эргэн харж, татгалзаж байхад Ferrari зорилгоосоо ухраагүй нь юм. 2025 оны авто зах зээлийн ирээдүй бараан харагдаж буй энэ үед, Ferrari-ийн онцгой амжилттай Q1 үзүүлэлт болон жилийн төсөөлөлдөө итгэлтэй хандаж байгаа нь салбарын хувьд шинэ амьсгал авчирч байна.
autoblog.com
