2025 оны Каннын кино наадмын улаан хивсний ёслолын үеэр Холливудын домогт жүжигчин Дензел Вашингтон урьдчилан зарлалгүйгээр хүндэт “Алтан далдуу мод” шагналыг гардан авлаа. Энэ бол түүний жүжигчний замналын 50 жилийн хугацаанд Каннын наадамд анх удаа оролцож буй тохиолдол бөгөөд шагнал гардуулах ёслол нь Спайк Лигийн шинэ кино Highest 2 Lowest-ийн нээлтийн үеэр болсон юм.
Наадмын захирал Тьери Фремо үзвэрийн өмнө Вашингтоны уран бүтээлүүдийг хамарсан тусгай хураангуй бичлэг танилцуулсан. Үүнд Спайк Лигийн найруулсан Malcolm X, Mo’ Better Blues кинонуудаас гадна, түүний “Оскар” хүртсэн Glory, Training Day бүтээлүүд багтжээ.
Хүндэтгэлийн мөчид Спайк Ли өөрийн гараар шагналыг түүнд гардуулж, “Миний төрсөн ах л гэсэн үг” хэмээн халуун дотноор хандсан бол Вашингтон энэхүү шагналыг “Жинхэнэ гэнэтийн бэлэг” хэмээн хүлээн авчээ.
Орчин үеийн Нью-Йоркт өрнөх сонгодог өгүүлэмж
Highest 2 Lowest кино нь Японы нэрт найруулагч Акира Куросавагийн 1963 оны High and Low бүтээлийн англи хэл дээрх шинэчилсэн хувилбар юм. Спайк Лигийн найруулсан энэхүү киноны үйл явдал орчин үеийн Нью-Йорк хотод өрнөх бөгөөд Дензел Вашингтон амьдрал, үхлийн заагт тулгарсан барьцааны хэрэгт холбогдсон хөгжмийн ертөнцийн нэр нөлөөтэй эрхмийг бүтээжээ.
Түүнчлэн кинонд реппер A$AP Rocky нь “Yung Felon” хэмээх өсөж яваа уран бүтээлчийн дүрд тоглож, мөрөөдөлдөө хүрэхийн тулд юу ч хийхээс буцахгүй залуугийн дүрийг гаргажээ. Мөн Илфенеш Хадера, Жеффри Райт, Ice Spice (кинонд анх удаа тоглож буй), Дийн Уинтерс, Жон Дуглас Томпсон, ЛаШанз, Обрей Жозеф, Майкл Поттс, Вэнделл Пирс нар туслах дүрүүдэд тоглосон байна.
Энэхүү бүтээл нь Спайк Ли, Дензел Вашингтон нарын 5 дахь хамтын ажил юм. Найруулагч Ли энэ оны эхээр Улаан тэнгисийн кино наадмын үеэр “Бид хамтдаа таван кино хийсэндээ л баяртай байна” хэмээн дурссан байдаг.
Highest 2 Lowest кино наймдугаар сарын 22-нд дэлхийн кино театруудад нээлтээ хийх бол есдүгээр сарын 5-наас Apple TV+ платформоор гарч эхэлнэ.
