Meta, Apple, Microsoft, Amazon компаниуд энэ долоо хоногт улирлын тайлангаа зарлахад нэг ижил өнгө аяс анзаарагдлаа. Энэ нь хиймэл оюун ухаанд хийж буй зарцуулалт огцом өсч, цаашид ч шинжээчдийн таамгийг давах төлөвтэй байна.
Ихэвчлэн хүлээлтээс давсан хөрөнгө оруулалт нь хөрөнгө оруулагчдыг баярлуулдаггүй ч энэ удаад эсрэгээрээ байлаа. Ялангуяа Meta, Microsoft компанийн хувьцаа тайлангийн дараа өсөж, зах зээлд хүчтэй хариу үзүүлэв.
Microsoft энэ улиралд түүхэндээ хамгийн өндөр капиталын зарцуулалтын төлөв гаргаж, хувьцааны үнэ түр хугацаанд өссөний ачаар зах зээлийн үнэлгээ нь 4 их наяд ам.долларт хүрсэн дэлхийн хоёр дахь компани болов.
Энэ өсөлтийн гол шалтгаан нь Meta болон Microsoft хоёул хийсэн хөрөнгө оруулалтдаа бодит орлогоор хариу өгч эхэлсэнтэй холбоотой.
Meta-ийн гол мөнгө олдог сурталчилгааны орлого нь энэ улиралд Wall Street-ийн таамгаас хэдэн тэрбум ам.доллараар өндөр гарч, Марк Цукерберг үүнийг зар сурталчилгааны системдээ хиймэл оюун ухаан нэвтрүүлснээс болсон гэж тайлбарлав. Тэрбээр мөн олон тэрбум ам.долларын хөрөнгө оруулж, “супер оюун ухаан”-тай AI хөгжүүлэх баг байгуулсан нь ирээдүйд сурталчилгааны бизнест илүү ашиг өгөхийг онцоллоо.
Microsoft-ын хувьд борлуулалт өнгөрсөн оныхоос 18% өсөж, үүлэн тооцооллын Azure платформын орлого энэ санхүүгийн жилд 75 тэрбум ам.долларт хүрч, жилийн дүнгээр 34% өсжээ. Үйлдвэрлэл ба бизнесийн програм хангамжийн орлого мөн таамгийг давж, Microsoft 365 Copilot зэрэг AI бүтээгдэхүүний өргөн нэвтрэлт үүнд түлхэц болсон гэж удирдлагууд хэлэв.
Хиймэл оюун ухааны зарцуулалтын тэсрэлт
Meta AI-ийн өрсөлдөөнд хоцорсныг хүлээн зөвшөөрсний дараа олон тэрбум ам.долларын зарцуулалттай давшилт хийж эхэлсэн. Үүнд өндөр түвшний мэргэжилтнүүдийг урвуулан авчрах, тэр дундаа олон сая ам.долларын гэрээгээр OpenAI-ийн ажилтнуудыг элсүүлэх зэрэг багтсан.
Мөн компани дата төвийн бүтээн байгуулалтад бүх хүчээ чиглүүлж байна. Цукерберг өнгөрсөн сард Meta AI дата төвүүдэд хэдэн зуун тэрбум ам.доллар зарцуулна гэж мэдэгдсэн. Ирэх жил компани анхны олон гига-ваттын хүчин чадалтай дата төвөө нээх бөгөөд зөвхөн нэг дата төв нь “Манхэттэний ихэнх хэсгийн талбайг эзэлнэ” гэж Threads дээрээ бичжээ.
Meta энэ онд 66–72 тэрбум ам.доллар зарцуулахаар төлөвлөж, ирэх жил үүнээс ч илүү хөрөнгө оруулалт хийхээр байна.
Microsoft ирэх жил 100 тэрбум ам.доллараас илүү зарцуулахаар төлөвлөж байгаа бөгөөд ихэнх нь AI-д зориулагдана. Зөвхөн ирэх улиралд гэхэд 30 тэрбум ам.долларын капиталын зарцуулалт хийгдэхээр байгаа нь компанийн түүхэн дэх хамгийн өндөр төлөв болжээ.
Apple ч мөн энэ долоо хоногт хүлээлтээс давсан орлого зарласан ч ихэнх нь iPhone-ийн борлуулалтаас үүдэлтэй байв. Гэсэн ч гүйцэтгэх захирал Тим Күүк хөрөнгө оруулагчдад хэлэхдээ өрсөлдөгчдөөсөө хоцрохгүйн тулд AI-д “нэн их” хөрөнгө оруулалт хийнэ, шаардлагатай бол компанийн худалдан авалт хийхэд ч бэлэн гэв.
AI-ийн эрэлт хөрөнгө оруулалтаа гүйцэх үү?
AI-ийн хамгийн том эргэлзээ бол зарцуулалт юм. Силикон хөндий энэ онд л гэхэд 300 тэрбум ам.доллар гаргасан гэж Financial Times тооцоолжээ. Гэвч эрэлт үнэхээр дагаж өсөх эсэхэд бүгд итгэлтэй биш байна. Хэрэв өсөхгүй бол салбар томоохон хямралд орж болзошгүй.
АНУ-ын Холбооны Нөөцийн банк өнгөрсөн сард гаргасан судалгаандаа генератив AI-ийн гол сорилт нь технологийн боломж бус, харин бодит хэрэглээ хязгаарлагдмал байгаад оршиж байна гэжээ. Технологи нь одоогоор технологи, шинжлэх ухаан, санхүүгийн салбараас бусад газарт өргөн нэвтрээгүй, голчлон томоохон компаниуд ашиглаж байна.
Технологи улам боловсронгуй болох тусам эрэлт өснө гэж найдаж байгаа ч яг хэдий хэмжээний өсөлт гарах нь тодорхойгүй. Хэрэв хүлээсэн шиг өсөлт гарахгүй бол 1800-аад оны төмөр замын хэт өргөтгөлөөс үүдсэн эдийн засгийн уналт шиг “сүйрлийн үр дагавартай” байж болзошгүйг судалгаанд анхааруулжээ.
AI-ийн эрэлт хөрөнгө оруулалтын хэмжээнд хүрэх эсэх нь одоогоор тодорхойгүй ч энэ улирлын тайлангууд AI-ийн ирээдүйд найдаж буй хөрөнгө оруулагчдад томоохон итгэл өглөө.
Гэхдээ илүүдэл зарцуулалтын эрсдэл хэвээр. Хэрэв түүхэн дээд хөрөнгө оруулалт нь бодит эрэлт ба орлогын өсөлтөөр дагалдахгүй бол, ялангуяа үндсэн бизнес дээр нь ашиг авчрахгүй бол “сүйрлийн үр дагавар” гарах боломж байсаар байна.
Эх сурвалж:
