2025 оны Gamescom үзэсгэлэнгийн үеэр олон шинэ тоглоом танилцуулагдсаны дунд шинжлэх ухааны уран зөгнөлт сонирхогчдын анхаарлыг хамгийн их татсан бүтээл бол “Лунар Страйк” хэмээх адал явдалт тоглоом байлаа. Cognition Europe студийн бүтээл энэхүү тоглоом нь 2026 онд PlayStation 5, Xbox Series X|S болон PC платформ дээр гарахаар төлөвлөгдөж байгаа бөгөөд Сар дээрх хүн төрөлхтний соёлын өвийг хадгалах тухай хүнд сэдвийг хөндөж байна.
Сарны гадаргуу дээрх сүүлчийн найдвар
“Лунар Страйк” тоглоомын үйл явдал 2119 онд өрнөх бөгөөд тоглогч шинэхэн сарны архивчийн дүрд тоглон, Сарны сүүлчийн колониг хамгаалах үүрэгтэй. Гэвч энэхүү колони тэнгэрээс ирэх нууцлаг аюултай нүүр тулна. Хэдийгээр хөгжүүлэгчид тоглоомын гол аюулыг тодорхой дэлгээгүй ч, трейлерт гарсан нэгэн биет 67P/Чурюмов–Герасименко сүүлт одыг санагдуулахуйц байдлаар дүрслэгдсэн байв.
Тоглоомын ертөнц нь бодит шинжлэх ухаанд суурилсан байхаас гадна, сарыг бүх талаас нь судалж, нарийвчлалтайгаар дүрсэлсэн. Үүний тулд Cognition Europe сансрын мэргэжилтнүүдтэй хамтран ажилласан бөгөөд тоглоомын ерөнхий физик, орчны нарийвчлал нь шинжлэх ухааны үндэслэлтэй юм.
Бодит түүхээс сэдэвлэсэн уран зөгнөл
Тоглоомыг бүтээсэн Cognition Europe студийн үүсгэн байгуулагч, бүтээлч захирал Брайан Попе нь шинжлэх ухааны мэдлэгийг тоглоомоор дамжуулан олон нийтэд хүргэхийг зорьдог нэгэн. Тэрээр өмнө нь кино, телевизийн салбарт дүрслэлийн эффект уран бүтээлчээр ажиллаж байжээ. 2015 онд тэрээр “The Arc/k Project” нэртэй ашгийн бус байгууллага байгуулж, хүн төрөлхтний соёл, дурсамжийг дижитал хэлбэрээр хадгалах үйлсэд хувь нэмрээ оруулж эхэлсэн байна.
Попе “Лунар Страйк” тоглоомыг “өвийг хамгаалах тухай соёлын төсөл” гэж нэрлэдэг. Тоглоомын сөрөг талын дүрүүд зөвхөн сарны колониг устгахыг бус, хүн төрөлхтөн хэзээ нэгэн цагт тэнд байсан бүх нотолгоог үгүй хийхийг хүсдэг. Энэхүү сэдэв нь түүхийг устгах бодит жишээнүүдээс санаа авч бүтээгдсэн гэдгийг тэрээр хэлжээ.
Хүчирхийлэлд бус, судалгаанд төвлөрсөн тоглоомын явц
“Лунар Страйк” нь уламжлалт тулаант тоглоом биш. Хүчирхийлэл бүхий тоглоомд дассан тоглогчдод энэ нь өөр мэдрэмж төрүүлэх нь дамжиггүй. Попе хэлэхдээ, “Тоглоом бүрэн хүчирхийлэлгүй биш ч хүчирхийллийг магтан дуулдаггүй. Энэ бол судалгаа, шинжлэх ухаанд суурилсан адал явдал” гэжээ.
Тоглогчид сарыг судалж, гадаргууг сканнердах, түүхэн дурсгалт объектуудыг хадгалах, таавар таах зэрэг сорилтуудтай тулгарна. Зарим үед цаг хугацаатай уралдаж, сарны байгалийн хатуу ширүүн нөхцөлд өөрийгөө хамгаалах шаардлагатай ч болно.
“Яагаад сансарт гарах нь чухал вэ?” гэсэн асуултад хариу өгөх оролдлого
Тоглоомын философийн үндэс нь: “Бид дахин сансарт гарах гэж байгаа энэ үед олон хүн ‘яагаад энэ нь чухал вэ?’ гэж асуудаг. Гэтэл судалгаа хийх, үл мэдэгдэхийг танин мэдэх, сониуч зангаараа хөгжих нь хүн төрөлхтний уг чанар” хэмээн Попе онцолсон.
Тэрээр дэлхийн гаднах орон зайг судлах нь зөвхөн технологийн дэвшил авчрахаас гадна, хүн төрөлхтний урт хугацааны оршин тогтнолд зайлшгүй хэрэгтэй гэж үздэг. “Нэг гараг дээр хэт удаан байх нь эрсдэлтэй. Харин судалгаа, шинжлэх ухаан, түүхийг хадгалах гэсэн соёлын сэдэв биднийг хол явахад чиглүүлнэ” гэж тэр тайлбарлажээ.
Бодит шинжлэх ухаанд суурилсан уран зөгнөл
“Лунар Страйк” нь уран зөгнөлт тоглоом боловч, ирээдүйг хэт уран сэтгэмжээр биш, бодит судалгаа, физикийн хязгаарлалтад үндэслэсэн байдлаар харуулсан нь онцлог. Тоглоомын баг сансрын системийн судлаач Ангело Вермюлентэй хамтран ажилласан бөгөөд тэрээр NASA-ийн дэмжлэгтэй HI-SEAS (Hawaii Space Exploration Analog and Simulation) хөтөлбөрийг удирдаж байсан туршлагатай эрдэмтэн юм.
Попе хэлэхдээ, “Бид гайхалтай түүхийг бодит ертөнцийн нөхцөлд ч өгүүлж чадна гэдгийг батлахыг хүссэн. Хиймэл таталцал, гэрлийн хурд гэх мэт хэт уран сэтгэмжийг ашиглахгүйгээр ч сэтгэл хөдөлгөм түүх бүтээж болдог” гэв.
Түүх, шинжлэх ухаан, тоглоом гурвын огтлолцол
“Лунар Страйк” бол зөвхөн нэгэн адал явдлын тоглоом биш. Энэ бол шинжлэх ухаан, соёл, хүний ёс зүй, түүхийг хамгаалах хосгүй сэдвүүдийг нэгтгэсэн бүтээл юм. Шинжлэх ухаанд дурлагч, сониуч зангаа тоглоомоор дамжуулан илэрхийлэх хүсэлтэй хэн бүхний заавал сонирхох ёстой бүтээл болж байна.
Тоглоомын албан ёсны нээлт 2026 онд PlayStation 5, Xbox Series X|S болон PC платформуудад болох бөгөөд дэлхий даяарх тоглогчид сарны гадаргуу дээрх хүн төрөлхтний оршихуйг хамгаалахад оролцох боломжтой болно.
Эх сурвалж:
