Эвертон шинэ залуу тоглогчийг багтаа нэгтгэлээ
Эвертон 19 настай жигүүрийн тоглогч Тайлер Диблингийг Саутгемптоноос дөрвөн жилийн гэрээгээр элсүүллээ. Энэ нь Дэвид Мойесийн зуны найм дахь шинэ тоглогч бөгөөд 42 сая фунт стерлингийн (≈ 184 тэрбум төгрөг) үнэтэй энэхүү гэрээ нь тэдний энэ зуны зарцуулалтыг 100 сая фунт стерлингээс давуулсан байна.
Tyler on Moyes. 🔵 pic.twitter.com/GjffytBENs
— Everton (@Everton) August 25, 2025
Диблинг Саутгемптонд 17 настайдаа 2023 онд дебютээ хийж, өнгөрсөн улиралд дээд лигт 33 тоглолтод оролцсон туршлагатай. Тэрээр evertontv-д өгсөн ярилцлагадаа:
“Энэ багт элссэндээ маш их баяртай байна. Клубын талаар сошиал медиа болон хүмүүсийн ярианаас аль хэдийн мэдэрсэн байсан. Би ийм их сэтгэл догдлон хүлээж байгаагүй бөгөөд одоо тоглолтоо эхлэхэд бэлэн байна” хэмээн сэтгэгдлээ хуваалцжээ.
Тэрээр цааш нь:
“Клубын өнөөгийн нөхцөл байдал, шинэ цэнгэлдэх хүрээлэн, гайхалтай фенүүд болон гэр бүлийн уур амьсгал нь намайг энэ багт нэгдэхэд төгс тохирсон” гэж онцолсон байна.
Өнгөрсөн амралтын өдрүүдэд шинэ цэнгэлдэх хүрээлэнд болсон тоглолтод Эвертон Брайтоныг 2-0 гоолын харьцаагаар хожсон бөгөөд Жак Грилиш онцгой тоглолт үзүүлсэн юм. Харин Мойес Диблингийн талаар:
“Тайлер бол авьяаслаг залуу англи тоглогч. Тэр довтолгооны сонголтыг нэмэгдүүлж, ихээхэн ирээдүйтэй тоглогч гэж би харж байна. Бид түүний хөгжлийг бүх талаар дэмжих болно” гэжээ.
Тэрээр мөн “Бид Эвертоны фенүүдийн бахархах, үзэхэд таатай багийг бүтээхийг хүсэж байгаа бөгөөд Тайлер энэ зорилгод маань чухал хувь нэмэр оруулна” хэмээн нэмж хэлэв.
