Нвидиа хиймэл оюун ухаантай роботын шинэ тархийг танилцууллаа
Хүмүүн төрхтэй робот илүү хүнлэг болох боломжтой юу? Нвидиа компани өнөөдөр илүү ухаалаг, бага эрчим хүч зарцуулдаг шинэ үеийн роботын тархийг танилцуулснаар энэ асуултад хариу өгөх алхмыг хийлээ.
Жетсон Тор – Роботуудад зориулсан супер тархи
Тус компанийн танилцуулсан Жетсон Тор супер компьютер нь хүмүүн төрхтэй робот болон ухаалаг машинуудад бодит цагийн хиймэл оюун ухааны тооцоолол хийхэд зориулагджээ. Энэ нь өмнөх загвар болох Жетсон Орин (Jetson Orin)-оос илүү их мэдээллийг бага эрчим хүчээр боловсруулах чадвартай бөгөөд хамгийн сүүлийн үеийн Блэквелл (Blackwell) график процессороор тоноглогдсон.
Нвидиа-гийн мэдээлснээр, Жетсон Тор нь:
- Хиймэл оюун ухааны тооцооллын чадал долоо дахин нэмэгдсэн
- Санах ой хоёр дахин том болсон
- Гүйцэтгэл гурав дахин хурдан, илүү үр ашигтай болсон байна.
Энэхүү шинэ чадвар нь роботуудад илүү хурдан харах, хөдөлгөөн хийх, шийдвэр гаргах боломжийг олгож, бодит орчинтой хүнлэгээр харилцахад тусална гэж тус компани тайлбарлалаа.
Томоохон компаниуд ашиглаж эхэлнэ
Нвидиа-гийн мэдээлснээр, анхны хэрэглэгчдийн дунд Amazon, Meta, Caterpillar, Agility Robotics зэрэг технологийн болон үйлдвэрлэлийн томоохон тоглогчид багтсан байна. Мөн John Deere болон OpenAI компаниуд ашиглах талаар судалж байгаа бол Стэнфорд, Карнеги Меллон, Цюрихийн их сургуулийн лабораториуд эмнэлгийн болон судалгааны орчинд туршиж эхэлжээ.
Жетсон AGX Тор хөгжүүлэгчийн иж бүрдэлд T5000 модуль, лавлагаа зөөвөрлөгч хавтан, цахилгаан хангамж болон идэвхтэй хөргөлтийн систем багтсан бөгөөд компанийн вэбсайтад 3,499 ам.доллар (ойролцоогоор 12.2 сая төгрөг)-оос худалдаалагдаж байна. Харин автономит тээврийн хэрэгсэлд зориулсан ижил технологитой Нвидиа Драйв AGX Тор есдүгээр сараас хүргэлтээ эхлэхээр урьдчилан захиалга авч байна.
Роботиксын ирээдүй
Нвидиа-ийн гүйцэтгэх захирал Женсен Хуанг:
“Энэ бол автономит тээврийн хэрэгсэл, роботикс, автономит машинуудад зориулсан арван жил байх болно” хэмээн CNBC-д онцолжээ.
Тэрээр роботиксыг хиймэл оюун ухаантай хослуулснаар олон их наяд долларын өсөлтийн боломж нээгдэхийг дурдсан байна. Энэ оны эхээр компанийн гаргасан Cosmos нэртэй AI загварууд нь хүмүүн төрхтэй робот сургахад зориулагдсан бөгөөд Хуангын тооцоолол хоосон биш гэдгийг харуулж буй.
Өнгөрсөн долоо хоногт Хятад улс анхны роботын олимп-ийг зохион байгуулсан нь роботиксын өрсөлдөөн хэр хурдтай урагшилж байгааг илтгэнэ. Гэхдээ техник хязгаарлалт, алдаа дутагдлууд байсаар байгаа нь энэ салбар бүрэн нэвтрэхэд цаг хугацаа шаардлагатайг харуулсан.
Нвидиа-ийн чухал долоо хоног
Тус компани энэ мэдэгдлээ хийхдээ цагийг зөв тааруулсан бөгөөд удахгүй санхүүгийн хоёрдугаар улирлын орлогоо тайлагнах гэж байна. Нвидиа хиймэл оюун ухааны зах зээлд давамгай байр суурьтай тул хөрөнгө оруулагчдын анхаарал өндөр байгаа. Гэхдээ АНУ, Хятадын худалдааны зөрчил болон MIT-ийн хиймэл оюун ухааны үр ашгийн талаарх шүүмжлэлүүд нь тодорхойгүй байдлыг нэмэгдүүлж байна.
Нвидиа саяхан зах зээлийн үнэлгээгээр 4 их наяд ам.доллар (ойролцоогоор 14.1 их наяд төгрөг)-т хүрч, түүхэнд анх удаа энэ босгыг давсан олон нийтийн компани болсон. Тиймээс одоо тус компани зөвхөн хиймэл оюун ухааны хөөсрөлт дээр тулгуурлаагүй гэдгээ батлах шаардлагатай болж байна.
Эх сурвалж: gizmodo
