Усан онгоцны ёроол яагаад улаан өнгөтэй байдаг вэ?
Та магадгүй анзаарсан байх, олон усан онгоцны ёроол улаан өнгөтэй байдаг. Харин дээд хэсэг нь ногоон, цэнхэр эсвэл цэргийн хөлөг онгоцонд түгээмэл хэрэглэгддэг саарал өнгөтэй байж болно. Энэ өнгө нь зүгээр нэг гоёл биш, далайн тээврийн салбарт олон зуун жилийн турш уламжлагдсан онцгой шалтгаантай.
Анти-фоулинг будгийн үүрэг
Улаан өнгө нь ихэвчлэн биоцид агуулсан анти-фоулинг будгаас шалтгаалдаг. Энэ нь хясаа, замаг, өт зэрэг далайн организм хөлөг онгоцны ёроолд наалдахаас сэргийлэх зориулалттай. Хэрэв эдгээр организм наалдвал усан онгоцны жин нэмэгдэж, хурд багасах бөгөөд түлшний зарцуулалт огцом нэмэгддэг.
Анти-фоулинг будгийн улаан өнгө нь зэсийн оксидын нэгдлээс гаралтай. Зэсийн нэгдэл нь усан онгоцонд наалдах амьд биетэд хортой тул ёроолыг цэвэр байлгаж, онгоцны хурд, түлшний үр ашгийг хамгаалдаг.
Түүхэн уламжлал
Зэсийг усан онгоцны гадаргууг хамгаалахад 1700-аад оноос хэрэглэж эхэлсэн. Британийн тэнгисийн цэрэг зэсийг өргөн ашиглаж, хөлөг онгоцны хурд, тэсвэрийг нэмэгдүүлж байсан. Харин 1863 онд Америкийн бизнес эрхлэгчид Жеймс Тарр, Даниел Вонсон нар зэсийн суурьтай будгийн патентыг гаргаж, далайн тээврийн салбарт шинэ эрин эхлүүлжээ.
Түүнээс хойш анти-фоулинг будгийг зөвхөн цэргийн хөлөг бус, аяллын том усан онгоц, загас агнуурын завь, хувийн хөлөг онгоцонд ч өргөн хэрэглэдэг болсон. Орчин үеийн технологи улаан биш бусад өнгийн будгийг ашиглах боломж олгосон ч улаан өнгийн ёроол нь уламжлалт хэв шинж болон түүхийн өвийг хадгалж байгаа хэрэг юм.
Эх сурвалж: Slashgear
