Мянганы үеийн цус сорогчид эргэн ирлээ: “Twilight” кинонуудыг YouTube дээр үнэ төлбөргүй үзээрэй
Романтик уран зөгнөлт жанрын домогт бүтээл “The Twilight Saga” дахин дэлгэцнээ гарч, мянганы үеийн интернэт шүтээн болсон цус сорогч, чонон чөтгөрүүд 15 жилийн дараа эргэн ирж байна.
Энэ цуврал нь Роберт Паттинсон (одоогийн Бэтмэн), Кристен Стюарт, Тэйлор Лотнер нарыг алдрын оргилд хүргэсэн бөгөөд дэлхий даяар нийт 3.3 тэрбум ам.долларын ашиг олж байв.
Lionsgate студи болон Fathom Events хамтран уг кинонуудыг кино театруудад дахин гаргах гэж байгаа бол шүтэн бишрэгчдэд зориулсан онлайн марафон 9-р сарын 7-ноос эхэлнэ.
YouTube-ийн албан ёсны сувгаар таван ангийг бүгдийг нь үнэ төлбөргүй үзэх боломжтой бөгөөд энэхүү марафон 9-р сарын 14-ний 23:59 цаг хүртэл үргэлжлэх юм. Хэрэв та Белла Сваны хэв маягаар тасралтгүй, шөнөжин сууж үзэхийг хүсэхгүй бол 10-р сард том дэлгэцэн дээр үзэх боломж дахин нээгдэнэ.
Энэхүү дахин нээлт нь зохиолч Стефани Мейерийн “Twilight” романы 20 жилийн ойтой давхцаж буй. Мөн Lionsgate студи “Midnight Sun” романаас сэдэвлэсэн шинэ телевизийн цувралыг Netflix-д зориулан бэлтгэж байгаа тухай мэдээлжээ.
