Николас Жексон Байерн Мюнхенд байнгын гэрээ хийхгүй гэж Ули Хёнесс мэдэгдэв
Байерн Мюнхен клубийн хүндэт ерөнхийлөгч Ули Хёнессийн хэлснээр Николас Жексон түрээсээр ирсэн ч байнгын гэрээ хийх нөхцөл биелээгүй тул тэр клубт үлдэхгүй аж. Жексон клубт ирэхдээ тоглолтын тооны босгыг хангаж чадвал 56.2 сая фунт стерлингийн (£) үнэтэй байнгын гэрээ хийх нөхцөлтэй байсан. Энэ хэлэлцээр Челси клубийн довтлогч Лиам Делап бэртэл авсны дараа бүтсэн бөгөөд эхэндээ түрээсийг цуцлах асуудал яригдаж байсан ч олон удаагийн яриа хэлэлцээний эцэст Байерн рүү явахыг зөвшөөрсөн байна.
Гэвч Хёнессийн хэлснээр, Жексон энэ босгыг хангахгүй бөгөөд түрээсийн төлбөр ч өмнө мэдээлэгдэж байснаас бага гэнэ. “Түрээсийн төлбөр 16.5 сая евро биш. Жексон болон түүний агент 3 сая еврогийн хувь нэмэр оруулсан тул бодитоор 13.5 сая евро л зарцуулсан” гэж тэрээр SPORT1-д ярьжээ.
Мөн тэрээр, “Байнгын гэрээ хэзээ ч болохгүй. Тэр зөвхөн 40 тоглолтод гараанд нэрлэгдсэн тохиолдолд байнгын гэрээ хүчин төгөлдөр болно. Гэхдээ тэр хэзээ ч тийм тоглолтын тоонд хүрэхгүй” хэмээн онцолсон байна.
Жексоныг ирэхээс өмнө Байерн клуб Германы шигшээ багийн тоглогч Ник Вольтемадег Штутгартаас авах гэж гурван ч удаа оролдсон ч бүтэлгүйтсэн байдаг. Вольтемаде эцэст нь Ньюкасл Юнайтед клубт 69 сая фунт стерлингийн үнээр нэгдсэн нь Хёнессийг гайхшруулсан байна.
“Бид Байерн Мюнхенд маш сэтгэл хангалуун байна. Энэ зуны шилжүүлгийн цонхны жинхэнэ ялагч бол бид. Бид аль хэдийн хүчирхэг бүрэлдэхүүнтэй бөгөөд нэмэлт зарлага гаргах шаардлагагүй байсан. Мэдээж, бид Флориан Вирцыг авахыг хүссэн ч 150 сая еврогоор хэзээ ч худалдаж авахгүй. Ник Вольтемадед 55 сая евро санал болгосон ч Штутгарт 75 саяыг хүссэн. Эцэст нь тэр 90 сая еврогоор явсан. Ньюкаслын хийж буй зүйл хөлбөмбөгтэй ямар ч холбоогүй — энэ бол зүгээр л Монополи тоглоом шиг зүйл” хэмээн Хёнесс шүүмжилжээ.
Эх сурвалж: 101 Great Goals
