Леброн Жэймсийн шинэ пүүзний цуврал: Хааны хүндэтгэл
Леброн Жэймсийн NBA-д орсон цагаас хойш сагсан бөмбөгийн ертөнц ихээхэн өөрчлөгдсөн. 2003 онд драфтаар сонгогдсон тэрээр өнөөгийн олон тоглогчидтой харьцуулахад илүү туршлагатай. Сагсан бөмбөгийн тоглолтын хэв маяг, биеийн хүчний өөрчлөлтүүдээс гадна пүүзний хөгжил ч мэдэгдэхүйц ахисан бөгөөд Жэймс энэ өөрчлөлтийн амьд гэрч нь билээ.
Nike-ийн тамирчин тэрээр саяхан GQ сэтгүүлд өгсөн ярилцлагадаа өөрийн шинэ пүүзний цуврал болох LeBron 23-ын талаар дэлгэрэнгүй ярьсан. “Хааны хүндэтгэл” хэмээх утгыг агуулсан энэхүү пүүз нь түүний 40 нас, 23 дахь улиралд тоглож байгаатай шууд холбоотой. LeBron 23 нь өнөөгийн сагсан бөмбөгийн эрч, хурдтай хэмнэлийг даган хөгжсөн технологитойгоороо онцлог бөгөөд тоглогчдод хурд, тав тух, хамгаалалтыг нэг дор санал болгож байна.
Леброны дурсамжаар, NBA өмнө нь илүү хүч шаардсан, удаан хэмнэлтэй спорт байсан бөгөөд тухайн үеийн тоглогчид Converse All-Stars зэрэг пүүз өмсдөг байжээ. Харин өнөөдөр тоглолт илүү хурдтай, динамик болж, пүүзний технологи ч дагаад хөнгөн, дасан зохицох чадвартай болсон байна. Тэрээр “Өмнө нь тоглолт илүү удаан, пүүз илүү хүнд байсан. Харин одоо тоглолт хурдан болсон тул пүүз ч үүнд нийцсэн байх ёстой” хэмээн онцолжээ.
6 фут 9 инчийн өндөртэй Леброн Жэймсийн хувьд хөнгөн, гэхдээ хангалттай хамгаалалттай пүүз нь маш чухал. Тэрээр “Пүүзний ул, дунд хэсэг болон түгжээний систем нь надад талбай дээр хурдтай хөдөлж, өндөрт үсрэх үед тогтвортой, найдвартай байдал өгдөг” гэж тайлбарласан юм.
LeBron 23 пүүз 10-р сарын 3-нд дэлхий даяар худалдаанд гарах бөгөөд дэвшилтэт технологийн шийдлүүд нь түүнийг хэрэглэгчдийн анхаарлыг татсан, өндөр борлуулалттай бүтээгдэхүүн болгоно гэж мэргэжилтнүүд үзэж байна.
Эх сурвалж: The SportsRush
