Хиймэл оюун ухаан урлагийг орлож чадах уу? Вернер Херцогийн анхааруулга
Алдарт найруулагч Вернер Херцог технологийн дэвшил, тэр дундаа хиймэл оюун ухааныг (AI) үгүйсгэдэггүй ч, хүний оролцоогүй бүтээлүүдийг “Амьгүй” гэж тодорхойлжээ.
Тэрээр “Conan O’Brien Needs A Friend” подкастад оролцох үеэрээ AI-ээр бүтээгдсэн кино, богино хэмжээний контентуудыг үзэж үзсэн тухайгаа дурдаад, “Тэд амьдралгүй, сэтгэл хөдлөлгүй, хоосон байдаг” хэмээжээ. Херцогийн үзэж байгаагаар ийм бүтээлүүд нь интернет дэх хамгийн нийтлэг, хамгийн доод түвшний өгөгдлөөс бүтдэг бөгөөд жинхэнэ урлагийн сүнсийг үгүй хийдэг аж.
Херцог хиймэл оюун ухааныг урлагийн “дайсан” хэмээн нэрлэсэн нь ч бий. Технологийн хөгжил гайхалтай ч, хүний мэдрэмж, алдаатай төгс бус байдал, энэ л жинхэнэ бүтээлийг төрүүлдэг гэж тэр үздэг. “Хиймэл оюун ухаан хааяа програмчлагдсан зүйлээс өөрөөр шийдвэр гаргадаг. Заримдаа энэ нь хүний байгалиас заяасан эмх замбараагүй байдлыг санагдуулдаг” гэжээ.
Тэрээр технологийг шууд эсэргүүцдэггүй ч, гүн гүнзгий сэжиглэдэг. Удаан хугацаанд гар утас ашиглаагүй бөгөөд зөвхөн Дублинд машины зогсоолын апп татах шаардлага тулгарснаар анх гар утас хэрэглэж эхэлсэн байна. “Гар утас, имэйл, зөөврийн компьютер бүгдэд сэжигтэй хандах хэрэгтэй” гэж Херцог хэлсэн нь технологид хэт итгэж болохгүй гэсэн дохио юм.
Подкастын үеэр Кона О’Брайен өөрийн муурын хогийн сав хүртэл интернетэд холбогдсон байдаг тухай хошигнон ярьсан бол, Херцог үүнийг залуу үеийн технологийн байгалийн мэдрэмжтэй зүйрлэсэн. Залуу хүмүүс фишинг имэйлийг амархан ялгаж чаддаг ч, ахмад үеийнхэнд энэ нь тийм ч амар биш. Хүмүүсийн энэ сэжиглэл тэднийг эртний хүмүүсийн адил хортой жимснээс зайлсхийх мэдрэмжтэй адилтгаж болно гэж Херцог онцолжээ.
Эцэст нь, Херцогийн шинэ номд өгүүлсэнчлэн, үнэн гэдэг ойлголт бол холын зорилго бус харин эрэл, эргэлзээ, ойртолт юм. “Хэн ч үнэн гэж юу болохыг бүрэн мэдэхгүй. Заримдаа сэтгэл хөдлөл л биднийг баримтаас давсан гүн утгад хүргэдэг,” хэмээн тэр тэмдэглэсэн нь, яагаад хиймэл оюунаар бүтээсэн урлаг хоосон мэт санагддагийг тайлбарлаж ч магадгүй юм.
Эх сурвалж: Gizmodo
