Барселона клуб Рашфордыг буцаахдаа санхүүгийн дарамт хүлээхгүй
Барселонагийн спортын захирал Деко Английн шигшээ болон Манчестер Юнайтедийн довтлогч Маркус Рашфордыг 2025 оны зун байнгын гэрээгээр элсүүлэхгүй тохиолдолд ямар нэгэн торгууль, хариуцлага хүлээхгүй гэдгийг албан ёсоор мэдэгдлээ.
Рашфорд энэ зун нэг улирлын зээлээр Каталон руу ирсэн бөгөөд Ньюкаслын эсрэг хийсэн Аваргуудын лигийн тоглолтод хоёр гоол оруулсан нь Барселонад өнгөрүүлж буй цаг үеийнх нь онцлох мөч байв.
🏴🌪️ Marcus Rashford at his brilliant BEST!
— LALIGA English (@LaLigaEN) September 30, 2025
No @FCBarcelona player has more goal involvements this season! pic.twitter.com/4HA92uxlte
Барселона түүнийг бүрэн эрхтэй худалдан авах нөхцөлтэй ч Декогийн хэлснээр, хэрэв клуб түүнийг улирлын дараа буцаахыг хүсвэл Манчестер Юнайтедээс ямар нэгэн төлбөр шаардахгүй.
Харьцуулбал, өмнө нь Челси клуб Жадон Санчог авч үлдээгүй шийдвэрийнхээ төлөө 5 сая фунт стерлинг (£5m буюу ~17.5 тэрбум төгрөг) төлөх шаардлагатай болсон. Харин Барселона Рашфордын гэрээнд ийм заалт оруулаагүй нь санхүүгийн хувьд том давуу тал болж байна.
Деко: “Бид Рашфордоор сэтгэл хангалуун байна”
“Мундо Депортиво”-д өгсөн ярилцлагадаа Деко:
“Бид түүнийг байнгын гэрээгээр авах сонголттой. Гэхдээ шийдвэр гаргах цаг хараахан болоогүй байна. Одоогоор бид Рашфордоор сэтгэл хангалуун байгаа. Тэр бидэнд хэрэгтэй зүйлийг өгч байна” гэжээ.
Тэрээр Рашфордыг “Маш өндөр түвшний тоглогч” хэмээн үнэлж, Манчестер Юнайтед клуб доторх өөрчлөлтүүд түүний тоглолтод нөлөөлсөн байж болохыг дурдсан юм. “Одоо бид ирэх тоглолтууддаа анхаарах хэрэгтэй. Харин дараа нь шийдвэрээ гаргана” гэж Деко нэмж хэлэв.
Rashford wonder goal 📽️#UCL pic.twitter.com/pZlOg6E2bb
— UEFA Champions League (@ChampionsLeague) September 19, 2025
Зүүн жигүүрийн төлөвлөгөө: Диаз, Уильямс, Рашфорд
Зуны наймааны үеэр Барселона зүүн жигүүрийн довтолгооны байрлалыг нөхөх гурван нэр бүхий сонголттой байв: Луис Диаз, Нико Уильямс, Маркус Рашфорд.
Диаз Ливерпүүлээс Байерн Мюнхен рүү явсан бол Уильямс Атлетик Бильбаод шинэ гэрээ байгуулсан. Үүний дараа Барселона Рашфордыг зээлээр элсүүлсэн юм.
Декогоос Луис Диаз “Төлөвлөгөө А” байсан эсэхийг асуухад тэр:
“Энэ бол ‘Төлөвлөгөө А, Б, С’ гэх асуудал биш. Манай дасгалжуулагч Ханси Флик маш туршлагатай, ухаалаг хүн. Бидний харилцаа эхнээсээ ойлгомжтой байсан. Бид чухал тоглогчдоо алдахыг хүсээгүй. Зүүн жигүүрт өнгөрсөн улиралд дутагдалтай байсныг нөхөхийг зорьсон” гэжээ.
Тэрээр Рашфордын наймаа амархан байсан шалтгааныг ийн тайлбарлав:
“Луис Диазын хувьд Ливерпүүлтэй хэлэлцээр хийхэд хүнд байсан. Харин Рашфордын хувьд Манчестер Юнайтед илүү нээлттэй хандсан тул бүх зүйл хялбар өрнөсөн.”
Уильямсын наймаа бүтээгүйд агент нь буруутай уу?
Барселонагийн зүгээс Нико Уильямсыг элсүүлэхэд ойрхон байсан ч эцэст нь хэлэлцээр амжилтгүй болсон. Энэ нь Атлетик Бильбаогийн зүгээс сөрөг хариу үйлдэл төрүүлсэн ч Декогийн үзэж буйгаар асуудлын гол нь тоглогчийн агент байв.
“Бид Уильямсыг өөрсдөө хайгаагүй. Харин түүний агент өөрөө санал болгосон. Энэ бол клубуудын хоорондын зөрчил биш. Хэрэв манай тоглогч өөрийн агентдаа бусад багтай хэлэлцээр хийх эрх олговол бид бусдад гомдох эрхгүй” гэжээ.
Эх сурвалж: 101GreatGoals
