18 жилийн турш 15.7 оноо, 11.8 самбараас бөмбөг авалт дундажлан тоглосон төвийн тоглогч
NBA-ийн “Супермен” хочит Дуайт Ховард 18 жилийн тоглолтын замналаа өндөрлүүлж, албан ёсоор тэтгэвэрт гарахаа зарлалаа. Тэрбээр 8 удаагийн NBA All-Star, 8 удаагийн All-NBA багийн гишүүн (тэдгээрийн 5 нь эхний баг), 3 удаагийн NBA хамгаалалтын шилдэг тоглогчоор шалгарч байв. Ховард 2004-2012 онд Орландо Мэжик, 2012-2013, 2019-2020, 2021-2022 онд Лос Анжелес Лэйкерс, 2013-2016 онд Хьюстон Рокетс багуудад хүчин зүтгэсэн.
Тэрбээр 2020 онд Лэйкерсийн хамт NBA аварга болсон бөгөөд 2009 онд Мэжикийн багийг NBA-ийн финалд хүргэсэн. Мөн Атланта Хоукс, Шарлотт Хорнетс, Вашингтон Уизардс, Филадельфи 76ers багуудад тоглосон. 40 настай Ховард 2022 оноос хойш NBA-д тоглоогүй бөгөөд 2025 онд Нэйсмитийн сагсан бөмбөгийн алтан танхимд элссэн.
Ховард X (хуучин Twitter) хуудсандаа энэ сарын 12-нд “Суперменаас” салж байгаагаа зарлаж, үзэгч фенүүд болон шүүмжлэгчдэд талархал илэрхийлсэн. NBA-д тоглосон хугацаандаа 19,485 оноо, 14,627 самбараас бөмбөг авалт, 2,228 хаалт хийсэн бөгөөд тоглолт бүрт 15.7 оноо, 11.8 самбараас бөмбөг авалт, 1.8 хаалт хийж байв.
2022-2023 оны улирлыг Тайванийн T1 лигийн Таоюань Леопардс багт өнгөрүүлж, All-Star тоглогч, All-Star тоглолтын MVP, T1 лигийн хамгаалалтын эхний багийн гишүүнээр шалгарсан. Өнгөрсөн зун Ice Cube-ийн Big3 лигийн LA Riot багт тоглож, 14.1 оноо, 8.9 самбараас бөмбөг авалт дундажлан сүүлийн мэргэжлийн улирлаа тэмдэглэсэн ч дахин тоглохоор бодож байгаагаа илэрхийлж байв.
Ховард NBA-д 2004 онд ахлах сургуулиа төгсөөд шууд драфтад орж, Орландо Мэжик багт эхний сонголтоор сонгогдсон. Тэр үеийн хамгийн шилдэг төвийн тоглогчдын нэг байсан бөгөөд таван удаа лигийн самбараас бөмбөг авах тэргүүлэгч, хоёр удаа хаалт хийх тэргүүлэгч болжээ. 2008 онд NBA All-Star долоо хоногийн үеэр слам данк тэмцээнд түрүүлж фенүүдийн хайр хүндэтгэлийг хүлээсэн.
Тэрбээр X хуудсандаа бүх сагсан бөмбөгөөс тэтгэвэрт гарч, гэр бүлдээ илүү цаг гаргах, дэлхийн олон нийтэд туслахыг зорьж байгаагаа мэдэгдсэн.
https://x.com/DwightHoward/status/2032148487832551681
