Майкл Каррик залуу тоглогч Коби Мэйноогоос ирээдүйд улам их зүйл хүлээж байгаагаа онцолжээ.
Бенфикагийн дасгалжуулагч асан Рубен Аморимын үед сэлгээнд сууж байсан 20 настай Мэйноо, Каррикийн түр удирдлагад ирснээс хойш Премьер лигийн есөн тоглолтод бүгдэд нь гараалж, төвийн хагас хамгаалалт дахь Каземиротойгоо сайн хамтраснаар Бруно Фернандес, Матеус Кунья зэрэг тоглогчдод тоглолтоо илүү өргөн дэлгэх боломжийг олгосон.
Түүний гайхалтай тоглолт нь Каррикийг Мэйноо улам хөгжихөд бэлэн гэдэгт итгэлтэй болгожээ. “Тэр олон зүйлийг сайжруулж чадна, энэ бол түүний насны онцлог. Түүний карьерын энэ шатанд хөгжих боломж нэлээд их байна” хэмээн Каррик онцолсон байна.
🚨🎥| Michael Carrick giving in depth instructions to Kobbie Mainoo during the game against Aston Villa.
You love to see it. 🏴❤️ pic.twitter.com/Nfr8vQpLk4
— Kev 屮 (@UtdKev08) March 17, 2026
Каррик Мэйноо болон бусад Манчестер Юнайтедийн гурван тоглогчийг Английн шигшээ багт дуудахыг хүлээж байна. Тэрээр энэ долоо хоногт Английн шигшээ багийн дасгалжуулагч Томас Тухель шинэ бүрэлдэхүүнээ зарлах үеэр Мэйноо, Люк Шоу, Харри Магуайр нарыг шигшээ багтаа дуудна гэдэгт найдаж байгаагаа илэрхийлжээ.
“Би тэдэнтэй холбоо бариагүй ч, тоглогчдын хувьд энэ удаад болон зуны тэмцээнд шигшээ багтаа дуудагдахыг би үнэхээр хүсч байна. Миний нөлөө байхгүй ч, тэдний тоглолтын хэмнэлээр бол тэд энэ яриа хөөрөөний дунд өөрсдийгөө зөв байрлуулсан гэж бодож байна” хэмээн Каррик нэмж хэлжээ.
Манчестер Юнайтед пүрэв гарагт талбайдаа Борнмуттай тоглоно. Тухель өнгөрсөн жилээс хойш Юнайтедийн тоглогчийг шигшээ багтаа дуудаагүй байгаа бөгөөд энэ тоглолт түүнд тэднийг ажиглах боломжийг олгоно. Каррик “Энэ бол хүнд тоглолт, тэд сайн формтой байгаа, тун хэцүү тоглолт болно. Тэд маш сайн дасгалжуулагчтай, эрч хүчтэй баг” хэмээн тоглолтын талаар дурдсан байна. Лиссандро Мартинез, Маттейс де Лигт, Патрик Доргу нар энэ тоглолтод оролцох боломжгүй бол, Нуссайр Мазрауи өвчнөөсөө эдгэрсэн хэмээн хүлээгдэж байна.
