Америкийн боксчин Гервонта Дэвис өөрийн хамгийн хүчтэй өрсөлдөгчөөр Роландо “Ролли” Ромерог нэрлэж, түүний цохилтыг “тоосгон мэт” мэдрэгдсэн тухайгаа ярилаа.
Сүүлийн тулаанаа 2025 оны гуравдугаар сард Ламонт Роучтой хийж, маргаантай тэнцсэнээс хойш рингнээ гараагүй Гервонта Дэвис, тухайн үед WBA холбооны хөнгөн жингийн аваргаа хадгалж үлдсэн ч олон хүн түүнийг азтай байсан гэж шүүмжилсэн. Энэ нь есдүгээр үед Дэвис өвдөг дээрээ унасан боловч рефери Стив Уиллис үүнийг нокаут хэмээн үзээгүй явдалтай холбоотой. Хэрэв тухайн үеийг 10-8 оноогоор Роуч авсан бол тэрээр Дэвисийг буулган авч, аваргын бүсийг авч чадах байсан юм. Үүнээс гадна Дэвисийн хувийн амьдрал дахь бэлгийн хүчирхийллийн хэргүүд түүний нэр хүндэд сөргөөр нөлөөлсөн.
Түүнээс өмнө Дэвис нь Жейк Полтой үзүүлэх тоглолтонд оролцохоор байсан ч хуурамчаар баривчилсан, танхайрсан, хүчээр баривчлахыг завдсан хэргүүдийн улмаас тулаанаас хасагдсан билээ. Одоогоор 31 настай тэрээр хэзээ эргэн ирэх нь тодорхойгүй байгаа ч, рингэн дэх хамгийн хүчтэй цохилтыг хэн өгдөг нь тодорхой болсон.
“Fight Hype” сэтгүүлд өгсөн ярилцлагадаа Дэвис одоогийн WBA холбооны welterweight жингийн аварга Роландо “Ролли” Ромерогийн хүчийг онцолжээ. Тэрээр “Үнэнийг хэлэхэд, ‘Ролли’ маш хүчтэй цохидог. Хүмүүс түүнийг дутуу үнэлдэг. Түүний хамгаалалт сул байдаг болохоор цохигддог ч, тэр чанга цохиж чадна. Би зөвхөн түүний цохилтыг л ‘тоосгон мэт’ мэдэрч байсан” гэж ярьсан байна.
Ромеро нь 2022 онд Дэвисийн эсрэг хөнгөн жинд тулалдаж, зургаадугаар үед техникийн нокаутаар ялагдсан ч, хожим нь 147 фунтийн жинд өөрийгөө шинээр батлан харуулсан. 2025 оны тавдугаар сард Райан Гарсиаг ялж WBA “Regular” бүсийг авсан тэрээр тухайн жилийн сүүлээр бүрэн аварга болсон. Харин Дэвис идэвхгүй байдал болон хуулийн асуудлуудаас шалтгаалж WBA холбооны хөнгөн жингийн “түр орхигдсон аварга” болсон юм.
