Америкийн кино урлаг болон тулааны спортын салбарт нэрээ мөнхөлсөн Чак Норрис 86 насандаа таалал төгссөн тухай түүний гэр бүл мягмар гарагт мэдэгдсэн байна. Тэрээр хагалгаанд орсныхоо дараахан эрүүл мэндийн гэнэтийн хүндрэлд орж, харамсалтайгаар амьдралынхаа замыг өндөрлүүлжээ. Ард нь эхнэр Гэна О’Келли болон таван хүүхдээ үлдээсэн байна.
Чак Норрис нь тулааны урлагийн ертөнцөд өндөр нэр хүндтэй нэгэн байсан бөгөөд олон ангит кино, уран бүтээлүүдээрээ дэлхий даяар алдаршсан. Тэрээр АНУ-ын Агаарын цэргийн хүчинд алба хаасны дараа тулааны урлагт амжилт гаргаж, каратэ, тхэквондо, жүдо, тан су до, бразилийн жиу житсу зэрэг төрлүүдэд хар бүс хүртсэн юм. Мөн өөрийн “Чун Кук До” урсгалыг үүсгэн байгуулсан билээ.
Түүний хамгийн алдартай бүтээлүүдийн нэг бол Way of the Dragon кино бөгөөд тус бүтээлд Bruce Lee-тэй хамтран тоглосон нь түүнийг дэлхийд таниулсан чухал үе болсон. Харин телевизийн салбарт Walker, Texas Ranger цуврал дахь Корделл “Корд” Уокерын дүрээрээ илүүтэй танигдсан юм.
Түүний нас барсан тухай мэдээлэл цацагдсаны дараа олон нийтийн сүлжээнд шүтэн бишрэгчид болон уран бүтээлчид амьдрал, уран бүтээлийг нь дурсан хүндэтгэл илэрхийлж байна. Гэр бүлийнхэн нь мэдэгдэлдээ “Манай хайртай Чак Норрис өчигдөр өглөө гэнэт таалал төгсч, бидэнд нөхөж баршгүй гарз тохиолоо. Тэрээр гэр бүлийнхнийхээ дунд, амар тайван байдалд байсан” хэмээн онцолжээ.
Чак Норрис нь холимог тулааны спортын Ultimate Fighting Championship буюу UFC-ийн үнэнч дэмжигч байсан бөгөөд түүнийг тоглоомын дүр болгон оруулах тухай санаа ч өмнө нь яригдаж байв. UFC-ийн ерөнхийлөгч Dana White 2014 онд ийм санаа дэвшүүлж байсан бол, судлаач Артур Дэвийн мэдээлснээр тэрээр 1993 онд болсон UFC 1 тэмцээнд оролцох шахаж байсан түүхтэй.
