Усны доорх ертөнцөд хийсэн цаг хугацааны туршилт шинэ дээд амжилт тогтоов.
Америкийн Майами хотын боомтын усан доорх орчны байдал, өсөлтийг ажиглах зорилгоор байрлуулсан цаг хугацааны туршилтын камер 1000 хоног давж, дэлхийн хамгийн удаан үргэлжилсэн усан доорх цаг хугацааны туршилт боллоо. Энэхүү туршилтыг 2023 оны тавдугаар сарын 1-нээс эхлүүлсэн бөгөөд 2026 оны нэгдүгээр сарын 28-нд 1000 хоногт хүрсэн байна.
Энэхүү төслийг 2007 онд байгуулагдсан “Coral Morphologic” байгууллага хэрэгжүүлжээ. Тэдний гол зорилго нь далайн амьдрал, ялангуяа шүрэн хадны нөхцөл байдлыг судлах, олон нийтэд таниулан, нөхөн сэргээхэд урам зориг өгөх явдал юм. Цаг хугацааны туршилтын камер нь 2023 онд нэлээд эрчимтэй явагдсан шүрэн хадны цайралтын улмаас үүссэн хохирлыг баримтжуулсан төдийгүй, янз бүрийн зүйлийн шүрэн хадны нөхөн сэргэлтийг ч харуулсан.
Туршилтын явцад онцгой анхаарал татсан зүйл нь тус бүс нутагт ургадаг “staghorn coral” буюу эвэр шиг шүрний өсөлт байв. Энэ төрлийн шүр цайралтад өртөөгүй төдийгүй маш хурдан өссөн нь тогтоогдсон. Одоо энэ нь Флорида мужийн тус зүйлийн шүрний хамгийн зузаан байгууламжуудын нэг болоод байна.
“Coral Morphologic”-ийн мэдэгдсэнээр, тус бүс нутгийн усны температурыг хэмжих хөвөгч нь зуны улиралд 32.6°C хүрч, өвлийн улиралд 15.5°C болж буурч байгааг тэмдэглэжээ. Энэ нь чухал ач холбогдолтой шүрэн хадны нэг төрөл хэт халуун болон хэт хүйтэн нөхцөлд дасан зохицох чадвартайг харуулж байна. Мөн тус туршилт нь боомтын эрчимтэй урсгалаас үүдэлтэй элсний хөдөлгөөний талаарх мэдээллийг цуглуулж байгаа аж.
Гурав гаруй жилийн тасралтгүй бичлэг хийсний үр дүнд уг камер 200 гаруй төрлийн загас, олон жилийн шүрэн хадны өсөлтийг баримтжуулжээ. Энэ нь дэлхийн усан доорх ертөнцийг хамгийн сайн судалж, тасралтгүй ажиглаж буй бүс нутгуудын нэг болоод байна.
