“Rainbow Six Siege” тэмцээний мэргэжлийн тоглогчдын цалингийн доод түвшин нь esports ертөнцийг цочирдуулж, салбарын санхүүгийн тогтвортой байдлын талаар хэлэлцүүлэг өрнүүллээ.
“Rainbow Six Siege” тэмцээний алдарт тамирчин, PSG Talon багийн дасгалжуулагч Жонатан “Jok3r” Паарш цахим хуудсаараа дамжуулан мэргэжлийн тоглогчдын цалингийн доод хэмжээг ил болгосон нь esports ертөнцөд багагүй шуугиан тарьж байна. Тэрээр Хойд Америк болон Европын ихэнх мэргэжлийн тоглогчид сар бүр 2,500 ам.доллар буюу түүнээс бага цалин авдаг гэдгийг дурджээ. Зарим багийн хувьд энэ нь сард 1,500 ам.долларт ч хүрэхгүй байгаа аж. Энэ нь Jok3r-ийн төрсөн Герман улсын хуулийн дагуу бүрэн цагаар ажилладаг хүний хамгийн бага цалингаас ч доогуур үзүүлэлт юм. Jok3r цахим хуудсандаа: “18-20 настай тоглогчид сард 1-1,500 ам.долларын цалинтай esports-д хичээллэж болно. Гэхдээ нас ахиж, энгийн амьдралыг эрмэлзэх үед энэ нь ухаалаг сонголт биш болно. Бид бүгд өрсөлдөх дуртай, оргилд хүрэх зорилготой ч энэ мөнгөөр мэргэжлийн тоглогчид, орчныг бүрдүүлэх боломжгүй” гэж байв.
Тэрээр ихэнх esports-ийн салбар ашигтай ажилладаггүй, тэмцээний зохион байгуулагчид болон байгууллагууд алдагдалтай ажилладаг тул хөрөнгө оруулалт, ивээн тэтгэгчдээс мөнгө олдог гэдгийг онцлон тэмдэглэв. Энэ ч утгаараа ихэнхдээ мөрийтэй тоглоом, криптовалютын компаниуд өөрсдийн логог өмсгөлдөө байрлуулах боломжтой болдог байна. Jok3r “Гэрээний хугацаа дууссаны дараа илүү олон тоглогчид зодог тайлна гэж би таамаглаж байна” хэмээн дүгнэжээ.
Энэ асуудал нь esports нийгэмлэгээс ихээхэн шүүмжлэл дагуулсан. Олон “Rainbow Six Siege” фэнүүд дунд зэргийн, амжилтгүй баг илүү их мөнгө авах ёсгүй гэж үзжээ. Нэгэн хатуу шүүмжлэлд “Хэрэв 22 настайдаа хожиж чадахгүй, эсвэл олон цаг зарцуулж жилд 50,000 ам.доллараас дээш орлого олж чадахгүй бол зодог тайлж, жинхэнэ ажлаа хийх хэрэгтэй. Аав ээжтэйгээ амьдарч, өдөржин тоглоом тоглоод хоосон хонох нь тийм ч сайн зүйл биш” гэжээ. Бусад нь Ubisoft-аас esports-ийн салбарт илүү хөрөнгө оруулах ёстой гэж үзэж байсан ч, тоглогчид цалин хангалтгүй байгаа тохиолдолд мөнгө олох өөр арга зам байдгийг дурджээ. G2 багийн тоглогч Жак “Doki” Робертсон “сэтгэлгээний асуудал” гэж энэ байдлыг тодорхойлсон байна. Тэрээр сард 2,500 ам.доллараас дээш цалин нэхэж буй дундаж тоглогчдыг “шуналтай” гэж шүүмжилсэн бөгөөд тэд тэмцээний шагналын мөнгөтэй нийлээд 5,000 ам.доллараас дээш олдог гэдгийг онцолжээ. “Siege-ийн шагналын сан бусад esports-той харьцуулахад маш өндөр. Гэхдээ та нар илүү их хичээл зүтгэл гаргахын оронд нөхцөл байдлын талаар гомдоллоод байдаг” гэж тэрээр нэмж хэлсэн байна.
Jok3r нь Doki-гийн байр суурийг эсэргүүцэж, ийм бага цалингаар “мэргэжлийн хүмүүсийг” татах боломжгүй гэж хариу мэдэгджээ. Энэ нь бага орлоготой байдлаас болж олон авьяаслаг тоглогчдыг алдахад хүргэж болзошгүй юм. Тэрээр их сургуульд байхдаа ийм цалинтай ажиллаж болох ч, насанд хүрсэн хүний хувьд ийм хүнд амьдралаар амьдрахыг хүсэхгүй гэдгээ илэрхийлсэн байна. “Rainbow Six Siege” нийгэмлэгийн өөр нэг гишүүн тоглогчдоос хамаагүй бага цалин авдаг “туслах ажилтнууд”-ын байдлыг онцолж, тэдний орлого, тэмцээний шагнал авах боломж, контент бүтээх арга зам нь хамаагүй хязгаарлагдмал байдаг тухай дурджээ. Энэ бол esports-ийн салбарт тулгарч буй олон бэрхшээлийн нэг нь бөгөөд “Super Smash Bros.” тоглогчид жилд ердөө 2,500 ам.долларын цалингаар тэмцээнд оролцож, аялдагтай харьцуулахад “Rainbow Six Siege” тоглогчид хамаагүй илүү мөнгө олдог бололтой.
