Улс даяар үргэлжилсэн эрчим хүчний хямрал нь Кубын ард иргэдийг нөмрөөд байна.
Кубын эрчим хүчний нэгдсэн сүлжээ өнгөрсөн бямба гарагт бүхэлдээ тасран зогссоноор тус улсын бүх нутаг дэвсгэр харанхуйд автлаа. Энэ нь тус улсад энэ сард тохиолсон гурав дахь томоохон эрчим хүчний тасалдал юм. Эрчим хүчний салбарын хуучирсан дэд бүтэц, АНУ-ын тавьсан шатахууны хоригоос үүдэлтэйгээр тус улсын коммунист Засгийн газар хүнд байдалд ороод байна.
Эхлээд Кубын Цахилгаан Эрчим Хүчний Нэгдлээс ямар нэгэн шалтгаан тодорхойлоогүйгээр бүх нийтийн цахилгаан тасарсан тухай мэдэгдсэн бол дараа нь Камагуэй мужийн Нуэвитас дулааны цахилгаан станцын нэгэн үүсгүүр гэнэт эвдэрснээс болсон хэмээн тайлбар хийжээ. Энэхүү эвдрэлийн улмаас цахилгаан эрчим хүчний сүлжээнд “давхаргилан нөлөөлсөн” бөгөөд Засгийн газраас чухал байгууллагуудыг хангахаар “микро-арлууд” байгуулж ажиллаж байгааг Эрчим хүч, уул уурхайн яамнаас мэдээлсэн байна.
Сүүлийн хоёр жилийн хугацаанд хуучирсан дэд бүтцийн эвдрэлээс шалтгаалсан цахилгаан тасалдал улсын хэмжээнд болон бүс нутгийн түвшинд түгээмэл болсон. Үүгээр зогсохгүй шатахууны хомсдолоос үүдэлтэй өдөрт 12 цаг хүртэл үргэлжилдэг цахилгаан тасалдлууд нь тогтолцоог улам тогтворгүй болгож байна. Өнгөрсөн даваа гарагт улсын хэмжээнд цахилгаан тасарч байсан бол энэ сард л гэхэд бямба гарагийн байдлаар хоёр дахь удаагаа, энэ сарын гурав дахь удаагаа ийм томоохон хэмжээний тасалдал үүсээд байна.
Ерөнхийлөгч Мигель Диаз-Канелийн мэдэгдсэнээр, сүүлийн гурван сарын турш гадаад нийлүүлэгчдээс шатахуун авч чадаагүй бөгөөд Куба улс өөрийн эдийн засгийг тэтгэх шатахууны ердөө 40 хувийг л дотооддоо үйлдвэрлэдэг байна. АНУ-ын экс Ерөнхийлөгч Дональд Трампын 2020 оны нэгдүгээр сард Куба руу шатахуун худалддаг буюу нийлүүлдэг улсуудад татвар ногдуулна хэмээн сүрдүүлсний дараа АНУ-аас тавьсан шатахууны хоригийг Засгийн газар нэмэлт шалтгаан болгон дурдаж байгаа юм.
