Вьетнамын Ерөнхий сайд ОХУ-д хийх албан ёсны айлчлалынхаа үеэр хоёр улс эрчим хүчний салбарт, тэр дундаа цөмийн эрчим хүч, газрын тос, байгалийн хийн хамтын ажиллагааны талаар хэд хэдэн чухал гэрээнд гарын үсэг зурна.
Ойрхи Дорнодод үүссэн геополитикийн нөхцөл байдал болон дэлхий даяар түлшний нийлүүлэлт тасалдсанд өртсөн Вьетнам улс өөрийн түлшний нөөцийг баталгаажуулах зорилгоор Орос улстай эрчим хүчний салбарт хамтын ажиллагаагаа өргөжүүлэхээр зорьж байна. Ерөнхий сайд Фам Минь Чинхийн хийж буй энэхүү айлчлал нь худалдаа, хөрөнгө оруулалт болон эрчим хүчний салбар дахь харилцааг шинэ шатанд гаргахад чиглэж байгаа юм.
Сүүлийн саруудад дэлхий даяар түлшний үнэ өсөж, Вьетнамын үйлдвэрлэлийн гол төвүүдэд 95 октантай бензин болон дизель түлшний үнэ 50-70 хувиар нэмэгдээд байна. Үүнтэй холбогдуулан Ерөнхий сайд Чинх Катар, Кувейт, Алжир, Япон зэрэг улсуудаас түлшний нийлүүлэлтийн дэмжлэг хүсэж, эх үүсвэрээ төрөлжүүлэхээр ажиллаж байгаа аж.
Айлчлалын хүрээнд Вьетнамын Ерөнхий сайд Фам Минь Чинх ОХУ-ын Ерөнхий сайд Михаил Мишустин нар худалдаа, эрчим хүчний салбар дахь хамтарсан төслүүдийг эрчимжүүлэх асуудлаар хэлэлцэнэ. Өмнө нь 2025 оны нэгдүгээр сард ОХУ-ын Ерөнхий сайд Вьетнамд айлчлах үеэр талууд цөмийн эрчим хүчний салбарт хамтран ажиллахаас гадна газрын тос, байгалийн хийн томоохон төслүүдийг хэрэгжүүлэхэд бэлэн байгаагаа харилцан нотолж байсан билээ.
