Аваргуудын лигийн шөвгийн наймд шалгарсан Барселона лигийн дараагийн тоглолтондоо Райо Вальеканотой учраа таарлаа.
Камп Ноу цэнгэлдэх хүрээлэнд болох энэ тоглолтын өмнө талбайн эзэн Барселона хүснэгтийн хоёрдугаар байрт бичигдэж буй Реал Мадридаас дөрвөн оноогоор тасраад байна. Тэд саяхан Аваргуудын лигийн шөвгийн 16-д Ньюкаслыг хоёр тоглолтын нийлбэр дүнгээр 8:3-аар (хариу тоглолт 7:2) бут ниргэж, дараагийн шатанд шалгарсан билээ. Нөгөө талд Райо Вальекано уналтын бүсээс дөрвөн онооны зөрүүтэй яваа бөгөөд лхагва гарагт Европын Конференц лигийн шөвгийн наймд Туркийн Самсунспортод хожигдсон ч дараагийн шатанд шалгарч чадсан юм.
Барселона багийн бүрэлдэхүүнд хамгаалагч Андреас Кристенсен, Жюль Кунде, Алехандро Бальде нар болон хагас хамгаалагч Френки де Йонг нар бэртлийн улмаас талбайд гарахгүй.
Барселонагийн гарааны бүрэлдэхүүн: Жоан Гарсиа, Жоао Кансело, Роналд Араухо, Пау Кубарси, Педри, Роберт Левандовски, Ламин Ямал, Рафинья, Фермин Лопез, Жерард Мартин, Марк Бернал.
Райо Вальекано багийн хагас хамгаалагч Диего Мендез удаан хугацаагаар тоглох боломжгүй байгаа бол вингер Илиас Ахомачийн бэртэл эргэлзээтэй хэвээр байна. Харин хамгаалагч Нобель Менди торгуулийн улмаас энэ тоглолтыг өнжихөөр болжээ.
Тоглолт ням гарагт 13:00 цагт (Улаанбаатарын цагаар 20:00 цагт) эхэлнэ.
Барселона Камп Ноу цэнгэлдэхдээ сүүлийн 13 тоглолт дараалан хожигдоогүй бөгөөд 2026 он гарснаар гэртээ хийсэн найман тоглолт тус бүрдээ дор хаяж гурван гоол оруулсан гайхалтай амжилттай яваа. Роберт Левандовски Ньюкаслын эсрэг хоёр гоол оруулснаар Барселонагийн төлөө нийт 117 гоолтой болж, багийн түүхэн мэргэн буучдын жагсаалтын 14-т Христо Стоичковтой зэрэгцэн ирлээ. Харин Райо Вальекано энэ улиралд лигт ердөө 28 гоол оруулсан нь довтолгооны үзүүлэлтээр тааруу багуудын тоонд багтаж байгаа ч ердөө 34 гоол алдсан нь хамгаалалт сайтай баг гэдгийг нь илтгэж байна.
