Байконурын сансрын төв дэх осолд өртсөн пуужин хөөргөх тавцанг засварлаж, анх удаагаа ашиглалтад орууллаа.
ОХУ-ын “Роскосмос” сансрын агентлагийн мэдээлснээр, Байконурын сансрын төвийн 31-р тавцангаас хөөргөсөн пуужингийн туршилтыг амжилттай хийжээ. Өнгөрсөн арваннэгдүгээр сард тус тавцан дээрээс “Союз MS-28” хөлгийг хөөргөх үед эвдрэл гарч байсан юм. Уг ослын улмаас ОХУ Олон улсын сансрын станц (ISS) руу сансрын нисгэгчдээ илгээх боломжгүй нөхцөл байдалд хүрээд байв.
Сансрын агентлагийн мэдээлснээр, эвдрэлтэй хэсгийн засварыг энэ сарын эхээр бүрэн дуусгажээ. Ням гарагт цацагдсан дүрс бичлэгт 31-р тавцангаас ISS руу ачаа тээврийн “Progress MS-33” хөлгийг амжилттай хөөргөж буй нь харагдсан байна. Хөлгийн нислэг төлөвлөгөөт ёсоор хэвийн үргэлжилж байгааг “Роскосмос”-ын тайлбарлагч онцоллоо.
Байконурын сансрын төв нь Казахстан улсын нутаг дэвсгэрт байрладаг бөгөөд ОХУ 2050 он хүртэл түрээсээр ашиглах гэрээтэй байдаг. Зөвлөлт Холбоот Улсын үед сансрын судалгаагаар дэлхийд тэргүүлэгч байсан Оросын сансрын хөтөлбөр 1991 онд ЗХУ задарснаас хойш санхүүгийн болон техникийн олон сорилттой тулгарч ирсэн. Тухайлбал, 2023 онд бараг 50 жилийн хугацаанд анх удаа саран дээр буулгахаар илгээсэн хөлгөө алдсан билээ.
