АНУ-ын Ерөнхийлөгч Дональд Трампын сонгуулийн кампанит ажлын менежер асан, ойрын зөвлөх Кори Левандовски Цагаан ордонд эргэн ирэх магадлал тун бага байгааг “New York Times” болон “NBC News” агентлагууд мэдээллээ. Сүүлийн нэг жилийн хугацаанд түүнийг тойрсон олон таагүй асуудлууд болон Дотоод хэргийн яамны ажилд хэтэрхий их оролцсон гэх шүүмжлэл үүнд нөлөөлсөн байна.
Левандовски Дотоод хэргийн яамны сайд Кристи Ноемын зөвлөхөөр ажиллах хугацаандаа албан тушаалын эрх мэдлээ хэтрүүлэн ашигласан гэх буруутгалтай тулгараад байгаа юм. Эх сурвалжуудын мэдээлж буйгаар тэрээр яамны ажилтнуудыг дур мэдэн ажлаас халж, 100,000 ам.доллараас дээш үнийн дүнтэй гэрээнүүдийг батлах, Хилийн хамгаалалтын удирдлагыг томилох зэрэгт шууд нөлөө үзүүлсэн байна.
Түүнчлэн түүнийг гэрээлэгчдээс мөнгө нэхсэн гэх мэдээлэл болон Кристи Ноемтой тогтоосон харилцааных нь талаарх таамаглалууд Ерөнхийлөгч Дональд Трампын дургүйцлийг ихээхэн хүргэжээ. Энэ нь түүнийг Цагаан ордонд эзлэх байр суурьгүй болгож, “эмзэг байдалд” оруулсан гэж шинжээчид үзэж байна.
Дотоод хэргийн яамны зарим ажилтнууд Левандовскиг хэл амаар доромжилж, ажлаас халахаар заналхийлж, айдас төрүүлдэг байсан хэмээн мэдүүлсэн байна. Харин түүний хуулийн төлөөлөгч эдгээр буруутгалыг эрс няцааж, Левандовски ямар нэгэн гэрээ хэлэлцээрт биечлэн оролцож, гарын үсэг зураагүй болохыг мэдэгдсэн юм.
Трампын засаг захиргаа шинэ томилгоонуудаа хийж буй энэ үед Левандовскигийн нэр жагсаалтаас хасагдсан нь түүний улс төрийн карьер дахь томоохон ухралт болж байна.
