Холимог тулааны Flyweight буюу хөнгөн жингийн босоо аварга, Их Британийн тамирчин Мухаммад Мокаев ирэх тавдугаар сард болох Netflix-ийн түүхэн дэх анхны MMA арга хэмжээнд оролцохоор бэлтгэж байна. Одоог хүртэл мэргэжлийн рингэнд ялагдал амсаагүй яваа тэрээр саяхан Brave CF байгууллагын анхны аварга болсныхоо дараа ийнхүү дэлхийн хэмжээний томоохон платформ дээр хүч үзэхээр болжээ.
Тавдугаар сарын 16-нд болох энэхүү үдшийг Жэйк Полын MVP (Most Valuable Promotions) компани зохион байгуулж байгаа бөгөөд гол тулаанд домогт Ронда Раузи, Жина Карано нар эргэн ирж тулалдахаар болсон нь дэлхий нийтийн анхаарлыг татаад байгаа юм. Мөн хүнд жингийн аварга Фрэнсис Нганну болон UFC-ийн од асан Нэйт Диаз нар энэхүү арга хэмжээний бүрэлдэхүүнд багтаад байна.
Мокаев өөрийн X (хуучнаар Twitter) хуудсандаа “Том тулаан зарлагдах гэж байна. Жэйк Пол удахгүй албан ёсоор зарлана” хэмээн бичсэн нь түүнийг энэхүү нүсэр бүрэлдэхүүнд багтсаныг илтгэж байна. Жэйк Пол ирэх мягмар гарагт Netflix-ээр шууд дамжуулах MVP MMA арга хэмжээний үлдсэн тулаануудыг албан ёсоор зарлахаа мэдэгдээд байгаа билээ.
Хэдийгээр Мокаевын өрсөлдөгч хэн байх нь одоогоор нууц байгаа ч түүнийг энэ жингийн домог Деметриус Жонсонтой тулалдаж магадгүй гэх таамаг сошиал орчинд хүчтэй яригдсан. Гэвч Д.Жонсон одоогоор уг мэдээллийг няцаагаад байгаа бөгөөд Британи тулаанчийн эсрэг хэн зогсох нь ирэх мягмар гарагт тодорхой болно.
Мухаммад Мокаев шиг залуу, ирээдүйтэй тамирчдыг ийм том хэмжээний арга хэмжээнд оролцуулж байгаа нь MVP компани MMA-ийн зах зээлд урт хугацаанд хүч үзэхээр төлөвлөж буйг харуулж байна. Мокаевын хувьд энэ нь Netflix-ийн олон сая үзэгчдэд өөрийгөө таниулах, улмаар UFC-д эргэн ирэх том боломж юм.
