АНУ-ын Калифорни мужид 22 жилийн өмнө гарсан хүн амины хэргийн нууц тайлагдаж, хууль хяналтынхан сэжигтнийг албан ёсоор баривчилсан байна.
Риверсайд мужийн Шерифийн газраас мэдээлснээр, 2004 оны есдүгээр сарын 1-нд Морено Велли хотод 29 настай Израэл Рангелийг буудаж хөнөөсөн хэрэгт буруутган 45 настай Кори Сэмпсоныг энэ сарын 19-нд баривчилжээ. Тухайн үед хохирогч Рангел олон удаа буудуулсан байдалтай олдож, эмнэлэгт хүргэгдсэн ч шархаа даалгүй нас барсан харамсалтай хэрэг гарч байв.
Хэргийн эхний шатанд мөрдөн байцаалт өргөн хүрээнд явагдаж, Сэмпсоныг сэжигтнээр тооцож байсан ч тухайн үед яллах хангалттай нотлох баримт бүрдээгүй тул хэрэг шийдэгдэлгүй “хүйтэн хэрэг”-ийн жагсаалтад шилжсэн байжээ.
Гэсэн хэдий ч Риверсайд мужийн “Хүйтэн хэргийг мөрдөх хэсэг” болон Дүүргийн прокурорын газрын “Гэмт бүлэглэлтэй тэмцэх баг” хамтран уг хэргийг дахин нягталж, шинэ баримт болон мэдээллүүдийг цуглуулж чадсанаар ийнхүү баривчлах үндэслэл бүрдсэн байна. Сэжигтэн Кори Сэмпсон одоогоор Хеспериа хотод саатуулагдаж, Ларри Д.Смитийн нэрэмжит хорих ангид хоригдож байгаа юм.
Одоогоор хэргийн сэдэл болон хохирогч, сэжигтэн хоёрын харилцаа холбооны талаарх дэлгэрэнгүй мэдээллийг албаныхан нууцалж байна. Мөрдөн байцаагчид уг хэргийн талаар нэмэлт мэдээлэлтэй иргэдийг Риверсайд мужийн цагдаагийн газартай холбогдож, туслалцаа үзүүлэхийг уриаллаа.
