НБА-ийн нэрт шинжээч Колин Коуэрд сагсан бөмбөгийн домог Майкл Жорданы Вашингтон Визардс багт өнгөрүүлсэн үеийг өнөөгийн сошиал медиагийн эрин үетэй холбон сонирхолтой дүгнэлт хийв. Түүний үзэж буйгаар, Жорданы карьерын төгсгөл хэсэг буюу 2001-2003 оны хоорондох үйл явдлууд хэрэв өнөөдрийн “NBA Twitter”-ийн үед өрнөсөн бол түүний нэр хүндэд томоохон цохилт болох байжээ.
Коуэрд Жорданыг Визардс багт тоглож байхдаа багийн залуу тоглогчдынхоо дургүйцлийг ихээхэн хүргэдэг байсныг онцолсон байна. Тэрээр Жорданы хэт түрэмгий, өрсөлдөөнтэй зан чанар нь ялалтад бэлэн биш байсан тухайн үеийн Вашингтоны залуу бүрэлдэхүүнийг дэмжих бус, харин ч улам хүнд байдалд оруулж байсан гэж үзэж байна. “Түүний багийнхан түүнд дургүй байсан. Хэрэв тэр үед сошиал медиа байсан бол Жордан энэ бүх шүүмжлэлд бяц даруулах байлаа” хэмээн Коуэрд ярьжээ.
Энэхүү сэдвийг хөндөхдөө тэрээр Леброн Жэймстэй харьцуулалт хийсэн юм. Өнөөдөр Леброн Жэймс 40 нас дөхөж байгаа ч өндөр түвшинд тоглосоор байгаа бөгөөд түүний тоглолт бүр сошиал медиагаар нарийвчлан шинжлэгдэж, шүүмжлэлд өртдөг. Гэсэн ч Леброны ийм урт хугацаанд тогтвортой тоглож байгаа чадвар нь Жорданы карьерын төгсгөл үеэс хамаагүй илүү үзүүлэлт гэдгийг зарим шинжээчид онцолж байна.
Коуэрдийн хэлснээр, Жорданы “Визардс”-ын үеийн дотоод зөрчлүүд нь үнэндээ баримтат кино хийхэд хамгийн тохиромжтой, “драма” ихтэй сэдэв боловч тухайн үеийн мэдээллийн хязгаарлагдмал байдал нь түүнийг “домог” хэвээр үлдэхэд тусалсан аж.
