Мэргэжлийн боксын ертөнцийн дуулиант тамирчин, WBC холбооны хагас дунд жингийн шинэхэн аварга Райан Гарсиа өнгөрсөн арванхоёрдугаар сард зодог тайлахаа зарласан Теренс Кроуфордыг рингэнд эргэн ирэхийг уриалав. Гарсиа саяхан олон нийтийн сүлжээгээр дамжуулан Кроуфордыг өөртэй нь тулалдахыг шахаж эхэлсэн бөгөөд энэ нь боксын хорхойтнуудын анхаарлыг ихээр татаж байна.
Теренс Кроуфорд хамгийн сүүлийн тулаанаа өнгөрсөн есдүгээр сард Канело Альваресын эсрэг хийж, супер дунд жингийн бүх бүсийг нэгтгэн үнэмлэхүй аварга болсноор карьераа өндөрлүүлсэн билээ. Гэвч Райан Гарсиа түүнийг “тэтгэврээс” нь гаргаж, өөртэй нь тулалдах нь хоёр талдаа асар их санхүүгийн ашиг авчирна гэж үзэж байна. Тэрээр “Би түүнийг бут цохих болно. Энэ тулаан Кроуфордын хувьд амьдралынх нь хамгийн том орлого олох боломж” хэмээн мэдэгджээ.
Райан Гарсиагийн хувьд саяхан Марио Барриосыг ялснаар 147 фунтын жинд дэлхийн аварга болсон бөгөөд одоо тэрээр өөрийн бүсээ хамгаалахын оронд Кроуфорд шиг том нэртэй тамирчинтай “супер тулаан” хийхийг эрмэлзэж байна. Хэдийгээр Кроуфорд зодог тайлсан ч Райан Гарсиагийн энэхүү зоригтой дуудлага нь түүнийг рингэнд дахин нэг удаа гарахад хүргэж магадгүй юм.
Шинжээчдийн үзэж буйгаар, хэрэв энэхүү тулаан албан ёсоор товлогдвол 2026 оны боксын ертөнцийн хамгийн их үзэгчтэй, хамгийн өндөр ашиг орлоготой үйл явдлуудын нэг болох нь дамжиггүй. Одоогоор Теренс Кроуфордын талаас энэхүү сорилтод ямар нэгэн албан ёсны хариу өгөөгүй байна.
