ОХУ-ын Дотоод хэргийн яамнаас гаргасан сүүлийн үеийн статистик мэдээллээр 2025 онд тус улсын иргэншил авсан гадаадын иргэдийн тоо эрс цөөрч, Украины дайн эхэлснээс хойш ажиглагдаж буй уналтын хандлага үргэлжилж байна. Өнгөрсөн онд нийт 152,400 хүн Оросын паспорт авсан нь өмнөх жилийнхээс 27.1 хувиар буурсан үзүүлэлт юм.
Харьцуулбал, дайны өмнөх 2021 онд 735,000 хүн иргэншил авч байсан бол энэ тоо 2023 онд 378,000, 2024 онд 209,000 болж жил дараалан буурсаар иржээ. Энэхүү бууралт нь гадаадын иргэдийн Оросын иргэншил авах сонирхол багассан төдийгүй тус улсын зүгээс цагаачлалын бодлогоо чангатгаж, хяналт шалгалтыг эрчимжүүлж буйтай шууд холбоотой гэж шинжээчид үзэж байна.
Статистик мэдээллээс харахад түр болон байнгын оршин суух зөвшөөрөл олголт ч мөн 30 орчим хувиар буурчээ. Хэдийгээр иргэншил авах сонирхол буурсан ч ОХУ-д хөдөлмөрийн гэрээгээр ажиллаж буй гадаад иргэдийн тоо 3 сая орчимд хүрч, өмнөх жилээс 7.6 хувиар өссөн байна. Энэ нь Оросын эдийн засаг ажиллах хүчний хомсдолоо нөхөхийн тулд шилжин ирэгсдийн хөдөлмөрийг ашигласаар байгааг харуулж буй хэрэг юм.
Үүний зэрэгцээ Оросын эрх баригчид хяналтын арга хэмжээг эрс чангатгаж, 2025 оны хоёрдугаар сараас хойш 850,000 орчим хүнийг цагаачлалын хууль зөрчигчдийн жагсаалтад оруулжээ. Эдгээр иргэдэд бизнес эрхлэх, үл хөдлөх хөрөнгө худалдан авах, банкны данс нээлгэх, жолооны үнэмлэх авах зэрэг үйл ажиллагаанд хатуу хязгаарлалт тавьж байна. Мөн хилийн чанадаас нутаг нэгтнүүдээ татах зорилготой “Эх орончдыг” шилжүүлэн суурьшуулах төрийн хөтөлбөрийн хамрах хүрээ ч хумигдаж, 2025 онд 26,700 хүн хамрагдсан нь 2010 оноос хойших хамгийн бага үзүүлэлт болжээ.
