Английн хөлбөмбөгийн холбооноос (FA) 2026 оны Комюнити Шилд тоглолтыг уламжлалт Уэмбли цэнгэлдэх хүрээлэнд бус, Уэльсийн нийслэл Кардифф хотын Принсипалити цэнгэлдэх хүрээлэнд зохион байгуулах шийдвэр гаргаснаа өнөөдөр зарлалаа. Улирлын нээлтийн тоглолт ийнхүү шилжих болсон гол шалтгаан нь Уэмбли цэнгэлдэх хүрээлэнд Канад улсын нэрт дуучин The Weeknd-ийн аялан тоглолт товлогдсонтой холбоотой ажээ.
Хөлбөмбөгийн холбооны мэдэгдэлд дурдсанаар, шинэ улирлын нээлт болох энэхүү тоглолт 2026 оны 8 дугаар сарын 16-ны ням гарагт Кардиффт болно. Уэмбли цэнгэлдэх хүрээлэнд The Weeknd-ийн тоглолт 8 дугаар сарын 14-нөөс 19-ний хооронд таван өдөр үргэлжлэхээр товлогдсон тул хөлбөмбөгийн тоглолт зохион байгуулах боломжгүй болсон байна. Иймд холбооны зүгээс өмнө нь Уэмбли цэнгэлдэхийг шинэчлэн засварлаж байх үед (2001-2006 он) тоглолтуудаа хүлээн авч байсан туршлагаараа Кардифф хотын цэнгэлдэхийг дахин сонгожээ.
Принсипалити цэнгэлдэх хүрээлэн нь Их Британийн хамгийн том цэнгэлдэхүүдийн нэг бөгөөд өмнө нь зургаан удаа Комюнити Шилд тоглолтыг амжилттай зохион байгуулж байсан түүхтэй юм. 2026-2027 оны Премьер лигийн улирал 8 дугаар сарын 22-ны бямба гарагт эхлэх бөгөөд түүнээс нэг долоо хоногийн өмнө болох Комюнити Шилд тоглолтын талаарх бусад дэлгэрэнгүй мэдээллийг 2025-2026 оны улирал дуусмагц зарлах юм байна.
