Олон улсын сансрын станцад (ISS) шаардлагатай ачаа тээврийг хүргэхээр явж буй Оросын “Прогресс 94” (Progress MS-33) хөлгийн автомат холболтын антенн сансарт гарах үедээ бүрэн нээгдээгүй нь техникийн хүндрэл дагууллаа. Уг хөлөг нь Казахстаны Байконур дахь сансрын буудлаас “Союз” пуужингаар 2026 оны 3 дугаар сарын 22-ны ням гарагт амжилттай хөөрсөн боловч тойрог замд орсныхоо дараа ийнхүү сааталтай тулгарчээ.
NASA-гийн мэдээлснээр, хөлгийн “КУРС” автомат холболтын системийн хоёр антенны нэг нь төлөвлөгөөний дагуу нээгдэж чадаагүй байна. Энэхүү антенн нь станцтай автоматаар холбогдоход шаардлагатай радарын дохиог дамжуулах үүрэгтэй юм. Гэхдээ антенны гэмтлээс бусад бүх систем хэвийн ажиллаж байгаа бөгөөд “Прогресс 94” хөлөг одоогоор станцад ойртох замаа хэвийн үргэлжлүүлж байна.
Уг асуудлыг шийдвэрлэхээр Оросын сансрын агентлаг “Роскосмос”-ын мэргэжилтнүүд ажиллаж байгаа бөгөөд хэрэв автомат холболт хийх боломжгүй болбол станц дээрх сансрын нисгэгчид хөлгийг гараар жолоодож холбохоор бэлтгэж байна. Тодруулбал, станцын дарга Сергей Кудь-Сверчков “ТОРУ” (TORU) хэмээх алсын удирдлагатай системийг ашиглан 3 тонн орчим жинтэй ачааны хөлгийг станцтай холбох хариуцлагатай үүргийг хүлээхээр болжээ.
“Прогресс 94” хөлөг нь станцад ажиллаж буй багийнханд зориулсан хүнс, түлш, шинжлэх ухааны туршилтын төхөөрөмж зэрэг нэн шаардлагатай хангамжийг тээвэрлэж яваа юм. Хөлөг 3 дүгээр сарын 24-ний мягмар гарагт станцын “Поиск” модультай холбогдохоор төлөвлөгдсөн бөгөөд NASA уг үйл явцыг өөрийн сувгуудаар шууд дамжуулах аж. Амжилттай холбогдсон тохиолдолд уг хөлөг зургаан сар орчим станцад байрлаж, дараа нь хог хаягдлыг ачин дэлхийн агаар мандалд шатаж устах замаар буцах юм.
