Английн Премьер лигийн Тоттенхэм Хотспур баг өөрийн дасгалжуулагч Игор Тюдорийн гэр бүлд тохиолдсон хүнд гарзын талаар албан ёсны мэдэгдэл гаргалаа. Дасгалжуулагчийн эцэг Марио Тюдор таалал төгссөн тул Игор Тюдор Ноттингем Форест багтай хийсэн тоглолтын дараах хэвлэлийн бага хуралд оролцох боломжгүй болсон байна.
Тоттенхэм багийн албан ёсны мэдэгдэлд “Манай багийн бүх гишүүд Игор Тюдорийн эцэг Марио таалал төгссөн тухай мэдээг хүлээн авч, гүнээ эмгэнэж байна. Энэхүү хүнд хэцүү цаг үед бид Игор болон түүний гэр бүлийнхэнтэй сэтгэл зүрхээрээ хамт байж, гүн эмгэнэл илэрхийлж байна” хэмээн дурджээ.
Талбай дээрх нөхцөл байдлын хувьд Тоттенхэм Хотспур баг сүүлийн тоглолтдоо Ноттингем Форест багт 3:0 харьцаатай хожигдож, лигийн хүснэгтэд доогуур байр руу унах аюултай тулгараад байна. Энэ оны эхнээс хойш дотоодын тэмцээнүүдэд ялалт байгуулж чадаагүй байгаа тус баг одоогоор доод лиг рүү унах бүсэд ойрхон байрлаж байгаа юм.
Харин Ноттингем Форест баг Лондон хотод хийсэн энэхүү тоглолтод ялалт байгуулснаар хүснэгтийн 16 дугаар байр руу ахиж, онооны зөрүүг нэмэгдүүлж чаджээ. Тоттенхэм багийн дараагийн шийдвэрлэх тоглолт ирэх дөрөвдүгээр сарын 12-ны өдөр Сандерланд багийн эсрэг болох тов гарсан байна.
