Италийн нийслэл Ром хотын захын Пиана дел Соле дүүрэгт ням гарагийн үдээс хойш хүчтэй дэлбэрэлт болж, гурван хүн хүнд бэртэж, хэдэн арван иргэнийг яаралтай нүүлгэн шилжүүлсэн байна. Уг дэлбэрэлтийн улмаас гурван орон сууцны барилга бүрэн сүйрчээ.
Урьдчилсан мэдээллээр, байшингийн ар талын цэцэрлэгт байрлуулсан байсан гал тогооны хийн баллон дэлбэрснээс энэхүү осол гарсан гэж үзэж байна. Дэлбэрэлтэд тус байшингийн эзэд болох 84 настай Микеле Де Бари, 86 настай Кьяра Де Бари нар өртөж, биеийнхээ 20 орчим хувийг түлж, Сант-Эугенио эмнэлэгт хүргэгджээ. Мөн нурангид дарагдсан 24 настай залууг аврагчид гаргаж, эмнэлгийн тусламж үзүүлж байна.
Ослын улмаас нийт таван орон сууцны барилга өртөж, дэлбэрэлтийн хэлтэрхийнүүд 300 метр хүртэлх зайд тархжээ. Онцгой байдлын албаныхан аюулгүй байдлыг хангах үүднээс ойр орчмын 70 орчим иргэнийг нүүлгэн шилжүүлсэн байна.
Ром хотын дарга Роберто Гуалтиери дэлбэрэлт болсон газарт ажиллаж буй гал сөнөөгч, цагдаа болон эмнэлгийн ажилтнуудад талархал илэрхийлээд, бэртсэн иргэдэд түргэн эдгэрэхийг хүслээ. Одоогоор дэлбэрэлт болсон барилга бүрэн нурж, ашиглах боломжгүй болсон бөгөөд албаныхан ослын шалтгааныг нарийвчлан тогтоохоор ажиллаж байна.
