Техникийн нарийн мэдлэгтэй хэрэглэгчдийн дунд алдартай, олон үйлдэлт “Flipper Zero” хакер төхөөрөмжид хиймэл оюун ухааны (AI) шинэ интерфэйс нэмэгдсэн байна. “Time 100 AI” шагналын эзэн, хакер Pliny the Liberator-ийн хөгжүүлсэн V3SP3R төсөл нь уг төхөөрөмжийг энгийн хэлээр удирдах боломжийг олгож, техникийн нарийн төвөгтэй үйлдлүүдийг хялбаршуулж өгчээ.
Энэхүү шинэ шийдэл нь Android үйлдлийн систем дээр чатбот хэлбэрээр ажилладаг бөгөөд Flipper Zero-той Bluetooth-ээр холбогддог байна. Ингэснээр хэрэглэгчид SubGHz протокол эсвэл IR формат зэрэг мэргэжлийн хэллэгийг мэдэх шаардлагагүйгээр, зөвхөн дуут болон бичгийн командаар төхөөрөмжийг удирдах боломжтой болж байгаа юм. V3SP3R систем нь үйлдлүүдийг автоматжуулахын зэрэгцээ аюулгүй байдлыг хангах үүднээс аливаа чухал өгөгдлийг устгахын өмнө хэрэглэгчээс заавал зөвшөөрөл авдаг механизмыг суулгажээ.
Хэдийгээр уг шинэчлэл нь төхөөрөмжийг илүү өргөн хүрээний хэрэглэгчдэд хүртээмжтэй болгож байгаа ч зарим туршлагатай хэрэглэгчдийн зүгээс шүүмжлэл дагуулж байна. Тухайлбал, уг төслийн харагдах байдал болон кодчлол нь хэтэрхий хиймэл харагдаж байна гэх шүүмжлэлүүд гарчээ. Мөн Flipper Zero-г ашиглан автомашин болон кредит картын мэдээлэл хулгайлах зэрэг хууль бус үйлдэл хийх эрсдэлийг AI улам бүр нэмэгдүүлж болзошгүй гэсэн болгоомжлол олон улсын хэмжээнд байсаар байна.
