NVIDIA компанийн гүйцэтгэх захирал Женсен Хуанг шинээр танилцуулсан DLSS 5 технологийн талаарх олон нийтийн шүүмжлэлд албан ёсоор тайлбар өглөө. 2026 оны видео тоглоомын салбарын хамгийн их маргаан дагуулсан сэдэв болоод буй уг технологи нь хиймэл оюун ухааны тусламжтайгаар тоглоомын дүр төрхийг хэт их өөрчилж, хөгжүүлэгчдийн уран бүтээлийн эрх чөлөөг хязгаарлаж магадгүй гэсэн болгоомжлолыг төрүүлээд байгаа юм.
Лекс Фридманы подкастад оролцохдоо Женсен Хуанг хэрэглэгчдийн санаа зовнилыг ойлгож байгаагаа илэрхийлсэн ч DLSS 5-ийн үндсэн зорилгыг олон нийт буруугаар ойлгосон гэдгийг онцоллоо. Тэрээр хиймэл оюунаар бүтээгдсэн контентүүд хоорондоо ижил төстэй харагдах хандлагатай байгааг хүлээн зөвшөөрсөн хэдий ч шинэ технологи нь тоглоомын уран сайхны илэрхийллийг үгүй хийх бус, харин ч хөгжүүлэгчдэд илүү өргөн боломж олгох зорилготойг тайлбарласан байна.
Хуангийн хэлснээр DLSS 5 нь тоглоомын дүрслэл болон хийцийг үндсээр нь өөрчлөх биш, харин чанарыг нь сайжруулах “хэрэгсэл” юм. Хөгжүүлэгчид энэхүү AI технологийг ашиглах эсэхээ өөрсдөө бие даан шийдвэрлэх бүрэн эрхтэй гэдгийг тэрээр батлан хэллээ. Өмнө нь тэрээр олон нийтийн сүлжээнд тархсан шог зураг болон шүүмжлэлүүдийн хариуд тоглоомчдыг уг технологийн талаар дутуу мэдээлэлтэй байна хэмээн мэдэгдэж байсан удаатай.
Маргаан дэгдэх гол шалтгаануудын нэг нь “Resident Evil Requiem” тоглоомын танилцуулга байв. Уг тоглоомын гол дүр болох Грейс Эшкрофтын царай анхны загвараасаа ихээхэн өөрчлөгдөж, “Инстаграм шүүлтүүр” ашигласан мэт харагдаж байна хэмээн шүүмжлэгчид дүгнэсэн юм. NVIDIA-гийн зүгээс энэхүү маргаан дагуулсан DLSS 5 технологийг энэ оны намар албан ёсоор худалдаанд гаргахаар төлөвлөж байна.
