Өмнөд Солонгосын tvN телевизийн шинэ бүтээл болох “Filing for Love” ангит киноны албан ёсны постер цацагдаж, үзэгчдийн дунд хүлээлт үүсгээд байна. Энэхүү кино нь томоохон корпорацийн аудитын багийн шилдэг ажилтан байсан боловч дотоод зөрчлийн асуудал хариуцсан хэлтэст шилжин ирсэн Но Ки Жүн (жүжигчин Гон Мён) болон нууцлаг, хатуу чанга зантай аудитын багийн дарга Жу Ин А (жүжигчин Шин Хэ Сүн) нарын хооронд өрнөх сонирхолтой харилцааг өгүүлэх офиссын романтик комеди юм.
Шинээр гарсан постер дээр гол дүрийн жүжигчид хаалтны завсраар хэн нэгнийг тандаж буй дүр зургийг харуулжээ. Жу Ин А-гийн хурц, сониуч харц болон түүний хажууд сандарсан мэт харагдах Но Ки Жүн нарын дүр төрх нь тэдний ажлын талбар дээрх өвөрмөц хамтын ажиллагааг илтгэж байна. Постер дээрх “Үнэнийг хэлэхэд, энэ бол бидний ажил” гэсэн бичиг нь тэдний мэргэжлийн ур чадвар болон хувийн харилцааны дундах нарийн заагийг сонирхолтойгоор дүрсэлжээ.
Киноны найруулагч Ли Су Хён энэхүү төслийн талаар ярихдаа “Хоёр гол дүр хамтран ажиллах явцдаа бие биенээ хэрхэн таньж, хамтдаа хөгжиж байгааг харуулах нь энэ киноны хамгийн чухал хэсэг юм. Жүжигчид өөрсдийн дүрүүдээ маш нарийн мэдрэмжтэйгээр амилуулж чадсан” хэмээн онцолсон байна. “Filing for Love” олон ангит уран сайхны кино ирэх дөрөвдүгээр сарын 25-ны орой 21:10 цагаас үзэгчдийн хүртээл болох юм.
