АНУ-ын Жонс Хопкинсийн их сургуулийн эрдэмтэд нурууны архаг өвдөлтийг үүсгэж буй гол шалтгааныг дарангуйлах замаар эмчлэх шинэ арга замыг илрүүлсэн байна. “Bone Research” шинжлэх ухааны сэтгүүлд нийтлэгдсэн энэхүү судалгаагаар паратироид даавар (PTH) нь нурууны нугалам дахь мэдрэлийн хэвийн бус өсөлтийг хязгаарлаж, улмаар өвдөлтийг үндсээр нь намдаах чадвартай болохыг тогтоожээ.
Судалгааны баг нурууны нугалам хоорондын дискний доройтол нь яс болон мэдрэлийн эсийн өсөлтөд хэрхэн нөлөөлдгийг хулгана дээр туршсан байна. Туршилтын явцад паратироид дааврыг тогтмол тарихад нурууны нугаламын яс илүү нягтарч, тогтвортой болоод зогсохгүй мэдрэлийн хэт өсөлт саарч, өвдөлт мэдрэх чадвар нь мэдэгдэхүйц буурсан үр дүн гарчээ.
Энэхүү механизмын гол нууц нь паратироид даавар ясны эсийг идэвхжүүлж “Slit3” хэмээх тусгай уургийг ялгаруулдагт оршиж байгаа юм. Уг уураг нь мэдрэлийн ширхэгүүдийг нурууны эмзэг хэсгүүд рүү нэвтрэн хэт их ургахаас хамгаалж, саад болох үүргийг гүйцэтгэдэг байна. Мэдрэлийн хэвийн бус ургалт ийнхүү зогссоноор өвдөлтийн дохио тархинд очих нь багасдаг аж.
Хэдийгээр уг судалгаа одоогоор амьтны загвар дээр амжилттай хийгдсэн байгаа ч ирээдүйд нурууны архаг өвдөлттэй сая сая хүмүүст зориулсан шинэ төрлийн эмчилгээний суурь болно гэж эрдэмтэд найдаж байна. Энэхүү нээлт нь зөвхөн өвдөлт намдаах бус, харин өвдөлт үүсгэж буй мэдрэлийн тогтолцооны өөрчлөлтийг засах боломжийг олгож байгаагаараа онцлог юм.
