“Apple” компанийг үүсгэн байгуулагч Стив Возняк удахгүй болох компанийнхаа 50 жилийн ойг угтан CNN сувагт өгсөн ярилцлагадаа хиймэл оюун ухааны (AI) ирээдүйн талаар өөрийн эргэлзээгээ хуваалцлаа. Тэрээр технологийн салбарын үсрэнгүй хөгжлийг үгүйсгэхгүй байгаа ч хиймэл оюун ухаан хүн төрөлхтнийг бүрэн орлох боломжгүй гэж үзэж байна.
Вознякийн тайлбарласнаар, өнөөдөр шинжлэх ухаан “тархи бүтээх” чиглэлд идэвхтэй ажиллаж байгаа ч хүн шиг төрөлх зөн совинтой, мэдрэмжтэй, бусдад туслах чин хүсэлтэй оюун ухааныг бүтээх шинж тэмдэг одоогоор ажиглагдахгүй байгаа аж. Тэрээр хиймэл оюун ухааныг өөрөө туршиж үзэхэд системээс ирж буй хариултууд нь хэтэрхий “хуурай”, хэт төгс мэдээлэл байсан бөгөөд хүн хоорондын харилцаанаас мэдэрдэг тэрхүү ойлголцол, дулаан уур амьсгалыг олж чадаагүйгээ онцолжээ.
Хиймэл оюун ухаан хүнийг орлож чадах эсэх тухай асуултад тэрээр “Би одоогоор тийм шинж тэмдэг харахгүй байна” хэмээн хариулсан юм. Технологи ирээдүйд маш ухаалаг болж, хүнийг ойлгодог болох боломжтойг тэрээр үгүйсгээгүй ч хүн шиг амьдралын замнал туулж, бодит мэдрэмжийг мэдрээгүй систем хэл ярианы нарийн нюанс, мэдрэмжийн ялгааг бүрэн тайлах боломжгүй гэж дүгнэж байна.
Технологийн салбарын домог болсон түүний энэхүү байр суурь нь хиймэл оюун ухаан хурдацтай хөгжиж буй энэ үед хүн төрөлхтний дахин давтагдашгүй мэдрэмж, хүнлэг чанарын үнэ цэнийг сануулсан чухал мессеж боллоо.
