ОХУ-ын Белгородын мужийн хилийн бүс нутгуудад Украины нисгэгчгүй онгоцны халдлага эрчимжиж байгаатай холбогдуулан орон нутгийн захиргаанаас иргэдэд хүнс, эм тариа хүргэхдээ хуягт тээвэрлэгч ашиглах шийдвэр гаргалаа. Мужийн захирагч Вячеслав Гладков хилийн дагуух аюултай бүсүүдэд хүнс болон шуудангийн үйлчилгээ үзүүлэх тээврийн хэрэгслүүдийг нисгэгчгүй онгоц илрүүлэгч болон цахим дайны (EW) системээр тоноглохыг үүрэг болгосон байна.
Захирагч Гладков энэхүү арга хэмжээг “байлдааны ажиллагаатай адилтгах түвшний зохион байгуулалт” хэмээн тодорхойлсон бөгөөд энгийн тээврийн хэрэгсэл ашиглах нь ажилчдын амь насанд хэтэрхий өндөр эрсдэл учруулж байгааг онцолжээ. Мөн хилийн зурвасаас 15 км-ийн дотор орших бүх худалдааны цэгүүдийг нисгэгчгүй онгоцны халдлагаас хамгаалах тор, элсэн уутаар бэхлэхийг даалгасан байна.
Сүүлийн нэг жилийн хугацаанд тус бүс нутагт пуужингийн халдлага гурав дахин, нисгэгчгүй онгоцны цохилт хоёр дахин нэмэгдсэн үзүүлэлттэй байгаа юм. Үүний улмаас энгийн иргэдийн хохирол ч мөн адил гурав дахин өсжээ. Мөргөлдөөний бүсэд интернет болон холбооны сүлжээ тасалдаж байгаа нь иргэдэд аюулын дохиог цаг тухайд нь хүргэхэд хүндрэл учруулж байгаа тул холбооны сүлжээг сэргээх “буулт хийх шийдэл”-ийг эрдэмтэн, мэргэжилтнүүдтэй хамтран хайж байгаа аж.
Белгородын муж нь Украинтай хил залгаа оршдог тул Оросын цэргийн ажиллагаа эхэлснээс хойш байнга халдлагад өртөж байгаа бөгөөд иргэдийн аюулгүй байдлыг хангах нь орон нутгийн захиргааны хамгийн том сорилт болоод байна.
