Санкт-Петербург хотын шүүхээс нэрт реппэр Oxxxymiron буюу Мирон Фёдоровт “гадаад улсын агент”-ийн тухай хуулийг удаа дараа зөрчсөн гэх үндэслэлээр 320 цаг нийтийн ажил хийлгэх шийтгэлийг эчнээгээр оноолоо. Тэрээр 2022 онд ОХУ-аас гарч явсан бөгөөд шүүх хуралд биеэр оролцоогүй ч шүүгч Роман Есютин түүнийг хууль зөрчсөн хэмээн үзэж ийнхүү шийдвэрлэсэн байна.
ОХУ-ын Хууль зүйн яамнаас Мирон Фёдоровыг 2022 оны 10 дугаар сард “гадаад улсын агент”-ийн жагсаалтад албан ёсоор бүртгэсэн юм. Хууль сахиулах байгууллагуудын зүгээс түүнийг өөрийн Telegram суваг болон бусад олон нийтийн сүлжээнд нийтэлсэн мэдээллүүддээ “гадаад улсын агент” гэсэн албан ёсны тодорхойлолтыг хавсаргаагүй нь тогтмол давтагдсан хэмээн буруутгаж байна. Өмнө нь тэрээр ижил төрлийн зөрчлөөр хоёр удаа торгуулж байсан бөгөөд ОХУ-ын цэргийн нэр хүндийг гутаан доромжилсон хэргээр мөн шийтгэл хүлээж байсан юм.
Oxxxymiron нь ОХУ-ын төр засаг болон Украинд явуулж буй цэргийн ажиллагааг ил тод шүүмжилдэг уран бүтээлчдийн нэг юм. 2023 онд түүний нэгэн дууг “ОХУ-ын нутаг дэвсгэрийн бүрэн бүтэн байдалд халдсан уриалга агуулсан” гэх үндэслэлээр ОХУ-ын нутаг дэвсгэрт сонсохыг хориглож байв. Хэдийгээр тэрээр эх орондоо байхгүй ч ОХУ-ын хууль хяналтын байгууллагууд түүний эсрэг эрүүгийн хэрэг үүсгэн, баривчлах зарлиг гаргаад байгаа аж.
