Нэгэн цагт Тайсон Фьюригийн зүгээс “хүнд жингийн хаан ширээг залгамжлагч” хэмээн өндөр үнэлэгдэж байсан Жаред Андерсон өөрийн замналаа эргэн босгож, оргилд хүрэх зорилгоо дахин зарлалаа. Өдгөө 26 настай Америк боксчин өнгөрсөн хугацаанд туулсан хүндхэн сорилтуудынхаа дараа илүү хүчирхэг болон эргэн ирж байгаагаа олон нийтийн сүлжээгээр дамжуулан мэдэгдсэн байна.
Түүний замналд 2024 онд Мартин Баколед тавдугаар раундад техникийн нокаутаар ялагдсан нь томоохон цохилт болсон юм. Тухайн үед шинжээчид Андерсоныг Баколе шиг туршлагатай боксчинтой тулалдахаас өмнө илүү олон бэлтгэл тулаан хийх ёстой байсан гэж дүгнэж байв. Мөн 2025 оны хоёрдугаар сард Мариос Коллиастай хийсэн тулаан нь олон нийтийн зүгээс шүүмжлэл дагуулж, түүний тоглолтын зохион байгуулалт сул байгааг харуулсан билээ. Гэсэн хэдий ч Андерсон “Одоо би бүх зүйлийг авах гэж байна. Надад хязгаарлалт гэж үгүй” хэмээн өөртөө итгэлтэй байгаагаа илэрхийлжээ.
Жаред Андерсоны менежер Боб Арумын “Top Rank” компани болон “Queensberry” промоушн хоорондын хамтын ажиллагааны гэрээ эцсийн шатандаа орсон байна. Төлөвлөгөө ёсоор тэрээр ирэх тавдугаар сарын 9-нд Манчестер хотод болох Фабио Уордли болон Даниэль Дюбуа нарын томоохон тулааны үеэр рингэнд гарах аж. Түүний учраа нь Соломон Даскрес байх төлөвтэй байгаа бөгөөд энэхүү тулаан нь Андерсоны хувьд дэлхийн шилдэгт эргэн ирснээ батлах чухал алхам болох юм.
Тайсон Фьюригийн бэлтгэл хамтрагч байхдаа үзүүлж байсан тэрхүү тэсрэлттэй тоглолтоо Жаред Андерсон Манчестерт дахин харуулж чадах эсэхийг боксын хорхойтнууд анхааралтай ажиглаж байна. Тэрээр энэ удаад зөвхөн амлалт биш, бодит ур чадвараараа хүнд жингийн боксын ирээдүйг тодорхойлохоор зорьж байна.
