Японы Кумамотогийн их сургуулийн судлаачид чихрийн шижин өвчтэй хүмүүсийн өдөр тутмын тарилгаас хамааралтай байдлыг эцэслэх шинэлэг платформыг амжилттай туршжээ. Олон арван жилийн турш эрдэмтэд инсулиныг ууж хэрэглэх хэлбэрт шилжүүлэхийг зорьж ирсэн боловч ходоодны хүчил болон ферментүүд инсулиныг цусанд шингэхээс өмнө задалж орхидог байсан нь гол саад болж байв.
Шинэ судалгаагаар эрдэмтэд “D-DNP-W” хэмээх тусгай пептидийг ашиглан инсулиныг гэдэсний ханаар дамжуулан цусанд хүргэх хоёр үр дүнтэй аргыг боловсруулжээ. Эхний арга нь пептидийг тогтворжуулсан инсулины бөөмстэй холих бөгөөд энэ нь цусан дахь сахарын хэмжээг хурдан бууруулж, үйлчилгээгээ гурван өдрийн турш тогтвортой барьж байсан байна. Хоёр дахь арга нь пептидийг инсулинтай химийн холбоогоор шууд холбож “коньюгат” үүсгэх замаар ижил төвшний үр дүнд хүрчээ.
Энэхүү шинэ технологи нь ууж хэрэглэсэн инсулины 33-41 хувийг биед шууд шингээх чадвартай (биохүртэхүй) болох нь батлагдсан байна. Энэ нь өмнөх туршилтуудтай харьцуулахад маш өндөр үзүүлэлт бөгөөд өдөр тутмын олон удаагийн тарилгын хүндрэлийг халж, өвчтөнүүдийн амьдралын чанарыг эрс сайжруулах боломжтой юм.
Судалгааны багийнхан дараагийн шатанд том амьтны загвар болон хүний биеийн онцлогт тохирсон эмнэлзүйн туршилтуудыг хийхээр төлөвлөж байна. Хэрэв энэ арга амжилттай болбол зөвхөн инсулин төдийгүй бусад тарилгаар хийдэг биологийн бүтээгдэхүүнүүдийг ч мөн ууж хэрэглэх хэлбэрт шилжүүлэх үүд хаалга нээгдэх юм.
